Güei yá ye sábado 5, tenía ganes de que llegare; contaba quedar na cama tres díes de siguío, pero yá me llevanté sobre les once y fici nun se cuántes coses.

La verdá que toi contentu, yo y pémeque Inma tamién. L’actividá estos díes pa nós foi ablucante. Yá veníemos de facer el Criáu nel Filarmónica y lo de Bastián y Bastiana en L’Entregu; en cuatro díes adatación d’un clasicu asturianu a teatru contemporáneu; dos díes de presentación y amuesa de trabayos d’escolinos sobre la Ilustración, el resultáu d’un trabayu de dos meses de sesiones preparatories nos centros; una presentación d’un concursu y pa rematar dos bolos de Bastián y Bastiana.

Nun debe ser la primer vez que mos toca facer dalguna heroicidá asina en quince años, pero yo yá nun m’alcuerdo cuala foi la cabera vez. En too casu, magar qu’Inma y yo tiremos d’esti carru, ye munchu más cenciello y mui prestoso facelo cola ayuda de xente como, nesti casu, Izar, Rodri, Sandra, Vanessa, Pablo o Manuel, y con muncha otra que siempres t’anima a siguir.

La pena que tengo ye qu’esti esfuerciu de toos y toes tenga tan pocu espardimientu; nun ye proporcional nin lóxico. Sedría necesaria una continuidá na amuesa de los trabayos, una difusión afayaiza. Camiento, y dígolo sinceramente y con tola modestia, que nun son trabayos cenciellos de facer, que sinifiquen dalgo endientro la cultura, la llingua y el teatru asturianos; y que si lo qu’intentamos ye abrir puertes y desendolcar la nuesa cultura arriqueciéndola con nueves propuestes, pues ye dalgo frustrante que nun s’abran, que nun se sepa, que nun figure en dengún llau, que nun-y importe a naide. A les funciones, sacante la primera de Nava, vieno mui poca xente. Esperamos que más públicu pueda disfrutalo, magar que sé qu’eso nun va pasar a curtiu plazu.

Pues quería descansar, pero güei tuvimos ponemos con otru proyeutu pal San Xuan, y otros pa mercaos, que nun pudimos facer la selmana pasada; tengo d’iguar l’escritoriu de casa que paez que pasó la cicloxénesis, y tengo ganes de retomar lo de la tesis, lleer tranquilu ya escribir un pocu. Pero sobre too, deseyo, pa mín, pa Inma, pa los que trabayen con nós y pa los y les que puedan disfrutar del nuesu trabayu, que vengan esti añu, polo menos quince selmanes como ésta.

Y nun sé por qué razón estos acontecimientos coinciden casi siempres cola xubida de la lluna…