Estuvimos allá, tuve la suerte de poder dir esti añu, por primer vez a la fiesta de la Descarga en Cangas del Narcea. Fiesta de tradición relixosa, magar que nun lo paeza, que posiblemente tea inxerta endientro’l ciclu de fiestes solares braniegues, y que dempués cristianizaríase. Los festexos, como ye sabío, tienen lugar al rodiu de la Virxen del Carmen. Saquen d’escursión la imaxe de la Virxen y van con ella en procesión dende la basílica barroca –que vista dende arriba como la vimos nós, ta llantada nun altu, güei tapecíu polos edificios que nun dexen albidrar la orografía del tarrén, una especie de cerru inaccesible a la vera d’una arrionda del ríu, que suxere’l llugar ónde taba asitiáu’l centru espiritual de los cangueses precristianos, o el so centru de poder– hasta la iglesia tamién barroca del Barriu del Carmen que ta al otru llau del ríu. Dende arriba vese bien peronde va la procesión porque van tirándose voladores según va avanzando peles cais hasta la ponte.

Equí ye onde podemos decatanos del amieste ente les tradiciones relixosa y minera pero otru llau, que llegaría a facer de la fiesta lo que ye anguañu. Ye un momentu emocionante cuando s’algama la ponte, ye’l momentu que tan esperando miles de persones, respírase muncha tensión; momentu yá preparáu por unos restallones previos, y que da pasu a lo que más me llama l’atención d’esta fiesta: cuando la fe cristiana, tolo que se mueve en torno a la Virxen, que se supón sinifica la necesidá humana de conxurar los mieos que-y son consustanciales (y que tampoco me paez qu’anguañu seya lo más importante, ye pamidea más una cuestión de tradición) se camuda en fervor paganu a la pólvora y al ruíu. Una fiesta relixosa paganizada dafechu.

Image

Cualisquiera que conoza a dalguna persona de Cangas del Narcea podría dicir ensin dubia, que lleva pólvora grabada na secuencia del ADN. Y nun ye estraño. Unes cincuenta peñes trabayen durante tol añu col enfotu de la fiesta. Páguenla de los sos bolsos. prepárense, vívese la fiesta durante tol añu. Y ello produz que la Descarga algame esi nivel catárticu. Esti añu fueron seis minutos y mediu nos que españaron sesenta mil voladores tiraos a comuña, en perfeuta sincronía ente la xente de les peñes y les máquines llantaes nel Prau del Molín. sesenta mil. La enerxía que se llibera ye bestial, tanto no emocional, como resultáu del trabayu desendolcáu y pol deseyu de que too salga bien, como no físico, poles ondes sonores y les de los propios españíos, por miles, concentraos en tan pocu espaciu de tiempu. El valle trema, les cases tremen, les persones tremen, trema’l mundu, y eso ye catártico.

Image

Guapa metáfora. Y más viniendo d’una comarca minera. Señal de que nestos tiempos cafiantes que cuerren con enfotu y trabayando a comuña puede algamase que too españe.

Pasélo bien, la verdá… Volveré.