La manifa d’ayeri en Xixón foi ablucante. Tengo dío a unes cuantes y nunca viera cosa semeyante. Hasta los medios de comunicacion del réxime falen de miles de manifestantes. Hai abondos comentarios que pueden atopase pel internet al rodiu d’esto, Y nun ye un panexíricu de la manifa lo que quiero facer.

Image

Hai un movimientu, un fechu, que me resulta alarmante, que dase fuera de les cais, y que mui poca xente sabe realmente les causes. Porqué razón agora s’amuesa la dixebra de criterios ente los sindicatos. Depués de que Villa saliera nes semeyes de mediu mundu. Depués de tola demostración de fuerza –escenificada perfechamente– de los sindicatos mineros que combinaron encierrros, guerrilla y marcha a Madrid. Depués de que los y les asturianes, sobre too los que nun tenemos esi poder de convocatoria nin d’organización, sintiéramosnos identificaos col movimientu mineru –frases como “la llucha de la mina ye la llucha d’Asturies” o “como pierdan los mineros perdemos toos”. Casualmente nesti intre de frañamientu social absolutu, provocáu pola indignación ante l’abusu y la impunidá.

Nun debe ser la primer vegada que pasa esto. Tendría de buscalo pa facer una referencia xustificada, pero tengo media idega que’l SOMA yá pautare col réxime delles vegaes, tamien ye verdá que n’otros contestos sociales, pero sí; por exemplu cola dictadura de Primo de Rivera (una pequeña hestoria del SOMA puede atopase en http://www.lne.es/asturias/2010/11/09/revolucion-reconversion/991762.html).

Poro, les asociaciones sindicales, que son preseos al serviciu de les persones qu’en teoría voluntariamente s’axunten pa defender los sos intereses, pueden entendese tamién como preseos susceptibles de tar al serviciu del sistema, o del poder, en mayor o menor midía, yá que tan institucionalizaes como tales asociaciones; esto ye control social y manipulación.

Image

A lo que quiero llegar ye a qu’espero que la hestoria nun seya la mesma; que me prestaría que’l SOMA, dempués de llevar la protesta sindical y ciudadana en comuña coles otres organizaciones sindicales al másimu (y tamién al másimu d’escenificación) nun xugase’l papel de preséu del poder encargáu de la dixebra y esboroñe d’esti movimientu. A esti temor contribúi’l fechu de qu’esti sindicatu anunciase un cambéu d’estratexa na reivindicación; contribúi que’l presidente Javier Fernández nun dixere nin esta boca ye mía, nin tan siquier pa llamar l’atención a la so collacia Esperanza Aguirre pola so falta de respetu; y contribúi la llamativa falta d’unidá sindical. Y más alló, tamién contribúi al temor y a la sospecha mesmamente la indignidá del repartu de los fondos mineros, los intereses creaos al rodiu d’ellos y el vergonzosu papel que desendolcaron los responsables,

Espero que’l SOMA por una vegada entienda los intereses dende abaxo y non dende arriba, Y eso, la unidá, la coherencia, tendrán que ser ente otros los y les afiliaes a los sindicatos los que lo desixan. Y prestaríame que’l movimientu del pueblu asturianu, espeyáu en manifestaciones como la d’ayer, agora xuníu al rodiu de la indignación y la inxusticia, tea perriba de los intereses d’una élite sindical; qu’exerza llibremente’l so drechu a desixir lo que considere preciso, y que vea dafechamente satisfeches les sos demandes a partir d’una pernecesaria unidá.

Y nun me fio nin gota. Caltendrémonos sollertes…