En cuantes que l’asuntu d’una amuesa artística cualisquiera tea venceyada a la cultura propia d’un territoriu,  que pue tar o non, pue falase de teatru con una identidá. Ye evidente. Esa identidá, nel teatru y artes escéniques pue dase de munches formes; ocúrreseme agora los testos dramáticos dende un puntu de vista dramatúrxicu, la recuperación y tratamientu d’asuntos históricos de la comunidá, o la crítica a los vezos y costumes sociales recientes, y yá, partiendo de l’antropoloxía, l’averamientu a les formes escéniques tradicionales dende un puntu de vista de recuperación y la so reutilización, y el procesu contrariu: partir de lo contemporáneo pa llegar a lo tradicional. Esto ye, en pallabres de Adolfo Camilo (2002, 97), “el teatru nacíu nun territoriu detemináu que fai por desplicar los porqués del mesmu a partir de les sos peculiaridaes”. Equí entra too: etnodrames, teatru relixosu, costumismu, contemporáneu, toles categoríes; pero que se tenga fecho n’Asturies o a partir de la so realidá, y que tenga que ver col so ámbetu xeográficu, la so cultura en xeneral, los sos conteníos sociales… La so identidá. Tamién podría ser el teatru de fuera d’Asturies, pero que tenga que ver cola nuesa realidá cultural, de dalguna forma.

En too casu, naide me va quitar de la cabeza que trabayar nestos ámbetos de lo cultural y lo identitario ye dalgo que depende de la voluntá de quien lo faiga y tamien de la ideoloxía. Nun too va ser por perres, evidentemente, magar que nun les haiga; habrá que tener dalgo d’ética. Pa mín, nun se pue facer teatru asturianu de raigón si nun tas a favor de la oficialidá, o si non se caltién un mínimu compromisu con una causa cultural xusta y, nesti casu, minorizada. Sedría lo mesmo d’honesto que si una persona ye homófoba se punxera a facer una obra pal Arguyu gay. Si nun se parte d’una ideoloxía, o d’una ética, ye fácil cayer nel oportunismu.

Caún ye llibre de facer lo que quiera, eso tá claro. Y allégrome que munchos compañeros y compañeres se dean cuenta agora qu’hai una estaya na que trabayar perimportante pal nuesu país (yo nun soi de Foro nin de coña, pero abúltame curioso qu’agora pa ellos y elles seya’l momentu indicáu, paez ser que’l pensamientu asturianista personalizáu en Carlos Rubiera o Vallaure cuayó y caltrió na sociedá a ciertos niveles ¿o non?), y de qu’esto seya una oportunidá de negociu, poques gracies.

Nosotros llevamos dende 1995 faciéndolo davezu, tanto que la investigación sobre nueves formes escéniques, la revisión antropolóxica o l’anovamientu de formes tradicionales constitúi una exa perimportante, y non la única, del nuesu llabor profesional. Poro, nun somos namái que nós; el grupu Telón de Fondu por exemplu lleva tola vida faciendo teatru n’asturianu col envís d’amuesar que la llingua ye valible pa representar lo que seya; Margen, y enantes Caterva, nos sos entamos ficieron montaxes sobre la hestoria asturiana, y retratos de la sociedá de la dómina; Nel Amaro, el mesmu Dolfo Camilo con Güestia…

A los demás nun sé, pero la nuesa esperiencia, que siempres atopó pilancos nuna alministración, casi siempres socialista, que nunca sofitó l’espoxigue nin el trabayu cultural identitariu por consideralu un pelligru pal sistema –a esto llega’l complexu d’inferioridá– nunca tuvo pa nos la suficiente reconocencia a nun ser d’un públicu mui específicu; yéremos una especie de frikis asturianiegos, la xente riíase de nós, nun te teníen en cuenta…

Nun queremos metenos con naide, sólo naguamos por tar nel sitiu que nos correspuende. Y como a testerones nun mos gana naide, llevamos munchu tiempu nesta xera, y abúltamos qu’hai un garrapiellu de xente nel seutor que piensa, agora que s’enteraron de qu’esiste, de qu’esti ye´l momentu de trabayar na estaya del teatru asturianu con raigón (nun sé porqué agora y non enantes, insisto) y qu’amenacien con constituíse n’élite abanderao del asturianismu nel teatru, vamos facer lo posible por espardir nes redes sociales el nuesu trabayu fechu dende fai más de quince años que pueda considerase Teatru Asturianu de Raigón. Igual paga la pena. Qu’ustedes lo disfruten.