Yá foi quién a meter esti artículu nel mio blogue, que yera lo suyo. Wordpress dióme problemes. 
 
 
El Día Mundial del Teatru instituyólu la UNESCO p’afitar la sensibilidá hacia esta categoría de la creación y espresión cultural. Fácil que fuere pa lluchar escontra la censura y pa solliñar la necesidá de la llibertá d’espresión. D’aende que pueda dicise que’l teatru y les artes escéniques alcuéntrense en situación minorizada al respeutu d’otres artes, necesiten de proteición, y los gobiernos son a los que se-yos encamienta curiar d’ello y facelo espoxigar. Mijail Bajtin desplica que’l Teatru hai d’entendelu según el pensamientu de cada dómina. Un xuglar, nel añu 1200, por casu, ye un señor que vive n’antroxu permanente, que caltién una conducta que nun ye la normal na so sociedá, y que tien cierta llibertá pa ser l’espeyu grotescu del Poder. Una especie de llocu consciente. Un trastornu de la personalidá llexitimáu, consentíu. Shakespeare, o Calderón, daqué escribieron d’eso. Hebio dellos cures, por casu, que dixeron qu’esta profesión yera dalgo tarrecible; el Papa Gelasio I prohibere nel añu 494 la celebración pagana de les Lupercales y sustitúila pol 14 de febreru, fecha na que muerre martirizáu un cristianu de nome Valentín; nel llibru Constituciones Generales de Obispo de Mondoñedo Fray Antonio de Guevara (1541) escríbese lo que vien darréu: (…) nos contó que en la noche de Navidad echan un gran leño al fuego que dura hasta el Año nuevo, y dan después para quitar calenturas de aquél tizón, y como esto sea rito diabólico y gentilicio anatemizamos, y descomulgamos y maldeciremos (…) Xovellanos mesmu trata a los comediantes como dalgo dispreciatible; cita na so Memoria pa la policía d’espeutáculos… la llei 34, tit. VI, part.I y VII; y constata que ya había en el S. XIII representaciones de objetos religiosos y profanos, y que se hacían por sacerdotes y por legos, que no sólo se hacían por meros apasionados sino también por gentes de PROFESIÓN, a quien declara infames otra ley coetánea. Escribe tamién: Castilla estaba llena de trovadores y juglares y juglaresas, de danzantes, representantes y menestriles, de mimos y saltimbanquis, y otros bichos de semejante ralea. Los xuglares, cómicos, y demás xente de malvivir, la xente que vive n’antroxu permanente, ye xente desaverao, que caltién comportamientos que nun son los que’l Poder nin la sociedá de la dómina camienta como normales, siendo, d’otramiente, un perfeutu complementu del poder. Pero les artes escéniques tamién son en sigo mesmes una fuente de poder. Esi poder afítalu l’espaciu escénicu, les carauterístiques d’una peculiar comunicación emisor-receutor, la capacidá crítico, la presunta cultura, l’espeyu grotescu, el discursu, la forma del discursu… Ye lo que’l Poder, el de verdá, nun pue tolerar, y esa ye la razón histórica pa facer que la sociedá refugue, marxine y desavere a esti coleutivu. En sociedaes medievales, como l’asturiana d’anguaño, esi conceutu caltiénse nel inconsciente coleutivu. Ye una especie d’arquetipu; d’aende que nin el Poder, nin la sociedá, considere les artes escéniques una profesión más, como cualesquiera, nin siquier un trabayu; d’aende que los y les intérpretes seyamos una especie de secta con comportamientos indeseyables; d’aende que se critiquen y censuren opiniones d’actores y actrices en foros públicos, ya inclusive obres de teatru; d’aende que se-yos tire pan a los monologuistes en dalgunes bodes; d’aende qu’haiga topicazos como’l que se diga que vivimos d’ayudes, talo que pordioseros, y non del nuesu trabayu, como cualesquier trabayador. El poder cultural asturianu tien un conceutu medieval de la nuesa profesión; arreniega de la so obligación de curiala y facela espoxigar; desavérala mediante desatención; condérgala a la desapaición pola mor de l’asfixa económico, arrequéxala na residualidá, privándola d’actividá. Ye más; suple la función social de la profesión con sucedáneos: actores que nun son actores, actrices que nun son actrices, persones que tienen otru trabayu, otro principios, otres metes na vida y que, polo tanto, son menos peligrosos pal sistema, son collaboradores necesarios del pensamientu medieval-reaccionariu, y amás, faen coses paecíes, casi como los profesionales, y salen muncho más baratos. Curiosamente n’otres fasteres del estáu esto nun pasa, o nun pasa tanto. N’otros llaos, que per otru llau tampoco tán, nel tiempu, muncho más alantre de la dómina medieval, considérase la profesión d’intérprete, el teatru, les artes escéniques como un seutor que xenera emplegu, riqueza y que tien una fin social; anque nun tolo que debieren, defenden la profesión, intégrenla, institucionalícenla. Equí non. Equí la profesión ta agora compuesta por unes doscientes cincuenta persones, o trescientes, que viven (o vivíen) d’ello direutamente, más tola actividá indireuta que xenera(ba). Un 4% de PIB en condiciones afayaíces. Y, magar que’l Poder y la sociedá nun se dea por enterada, dientro del grupu social de les artes escéniques hai, aparte de profesionales, tamién una élite; hai munchos titulaos y titulaes universitaries, investigadores o intelectuales que nun viven n’antroxu permanente. La desviación, el desaveramientu al que tá condergada l’actividá escénico n’Asturies, la tremenda agresión que sufre por parte del poder medieval inconsciente ya incultu algamó ya’l desaniciu de la profesión dafechu. Nun ye la crisis, nun son los bancos, ye l’escaezu, la falta d’atención, la incultura, l’anhedonia, la falta d’empatía cola profesión de la xente afitada nel poder que nun dexa más pasu al desaveramientu que camudase en delitu, en desaveramientu radical. Como tá pasando n’otres estayes llaborales de la vida cotidiano. Nin más nin menos. Muncha xente de fuera y de dientro de la profesión diz que falta unidá dientro d’ella. Yo nun lo creo. La cacariada unidá pue ser un arma de doble filu pa que la profesión quede desaverada una vegada más, cosa que-yos vendría bien a dalgunos elementos estraños a la profesión pa reforzar la so posición nel panorama teatral llariegu. Podríemos escolinganos profesionalmente de la cúpula del Niemeyer, o de la torre de la Llaboral; o podríemos garrar una escavadora, como’l chipriota, y valtiar les puertes de los centros de Caxastur; podríemos prender fueu a la conseyería cultura; pero nun me paez que’l delitu, al que mos empobinen, vaiga solucionar nada. El sistema, el poder, que ye mui llistu, tien previsto salides pa eso. Les llendes ente’l desaveramientu y el delitu son, por casu, manicomios y cárceles. Y la rabia ye muncha. Anque ye pa pensalo; ye lo único que nos queda, a lo que tán empobinándomos… Los preseos que podríen tener daqué de capacidá pa camudar esta llaceria son los partíos políticos, al traviés de los sos programes. El PSOE camienta que la cultura ye sinónimu de chiringuitu, y dalgún conceyal socialistu díznos que lo que facemos, el nuesu oficiu, podíemos facelo gratis. El PP ta enfotáu n’afitar la cultura del ésitu, amosada nun llibru que sacó va tiempu la FAES; Izquierda Xunida tien d’afiliáu a la persona, un prexubiláu, manipulador obsesivu, que quier amosar al mundu que’l teatru aficionáu ye más profesional que’l profesional, y que pa combatir la llaceria del profesionalismu nel teatru asturianu, monta una cadarma de poder impresionante: dos asociaciones de grupos de teatru aficionáu, un sala residente pal so grupu nel ayuntamientu onde foi conceyal de cultura (únicu casu de residencia no profesional en tol estáu), una escuela p’aficionaos (qu’entra en competencia cola educación reglada) con un presupuestu vergoñosu, sobre too pal Ayuntamientu de Llangréu… Vaya, un peligru de paisanu. De Foro nun se sabe nada; y d’UPyD meyor nun sabelo. La desconexón de los partíos cola sociedá, y col mundu de les artes escéniques en particular, ye total; y la contratrasferencia, muncha. Desaveramientu radical. Provocáau pola xente afitada nel poder, parapetada tres d’una pantalla, col mur nuna mano y na otra una calculadora, qu’empobinen los nuesos destinos al desaniciu; que s’axunta dacuando nuna mesa a falar de les nueses vides ensin considerase parte implicada nel fechu escénicu; que cobra por ello bien d’ello; que nun son quien a iguar midíes pa institucionalizar o afitar l’actividá escénica profesional. Ellos y elles son culpables de facenos perder, nun solo’l trabayu, sinón la vida. Porque nun vivimos nel medievu, nin n’antroxu permanente, nin de les ayudes, nin del aire. Porque los años pasen, y nun camuda nada, y los minutos de la vida valen ca vegada más. Y la sociedá tien drechu a disfrutar del nuesu llabor, y ellos la obligación de curialo y d’institucionalizalo. Y si non, pa iguar esti desaguisáu ancestral, esta inxusticia, lo primero, tendremos de quitalos de delantre. Esa xente desaverao, la xente que constitúi’l Poder cultural medieval asturianu, ta delinquiendo, ta perxudicando a la profesión y a la sociedá va munchos años. Conscientemente, pueque. Y el delitu tien de castigase de dalguna forma.