El caleyu que vos propongo ye de primer división. Teníalu fechu, pero’l día que foi taba emborrinao, orbayaba y nun se vía gota. Apetecíame volver a pasar, tábemos en Sotrondiu de visita y como fago davezu, empobinamos pa Mieres pel camín más llargu. Pagó la pena.

En pasando la ponte so El Ríu Nalón camín d’Uviéu, xusto ehí a la manzorga sal una carreterina qu’indica Urbiés. D’esmenu somórguieste nun vallucu perestrenchu que va pasando per dellos pueblos, ente ellos Santa Bárbola o La Potoxa. Al empar hai una ruta andariega o pa bicicletes que llega al Altu La Col.ladiel.la, que debe ser abondo interesante y prestosu pa dir con calma y disfrutar del bayurosu patrimoniu natural ya industrial que caltién. En tou casu, la carreterina AS-337 métese per esti Valle de Sta. Bárbola, paisax protexíu, y a cada curva qu’hai, que nun son poques, asáltanos una vista ca vegada más espectacular, hasta algamar los 900 metros sol nivel de la mar que marca un cartelu nel Altu.

IMG_20151216_123746

Valle de Sta. Bárbola, dende l’Altu La Col.ladiel.la

Pela zona hai munches rutes, como la que facíemos mención enantes, qu’aprovechen víes de ferrocarril que salíen de les mines, y carreteruques. Les edificaciones, aparte d’horros, paneres, molinos y llavaderos, que tamién los hai, identifíquense coles cases típiques de trabayadores de la zona, iguaes pa soportar l’agua y el fríu, pero ensin mayor interés arquiteutónicu.

IMG_20151216_124108

Valle de Turón, dende La Col.ladiel.la

Siguimos, y nel encruz d’esta xubida cola que vien de Ciañu, y enantes de baxar camín d’Urbiés, topamos col chigre Casa Migio. Nun yera la hora xintar, asina que tomamos un cafetucu y aprovechamos pa echar una güeyada. Ellos ufren callos caseros y corderu a la estaca como platos principales. Tien mui bona pinta’l chigre, con comedor, sidra y de xuru que quesu d’Urbiés.

N’acabando arrancamos camín de Mieres, pasando per esti pueblu d’Urbiés que sosprende polo grande que ye pa tar encoláu onde tá; ensin dubia, la mina marcó’l desendolque d’esta villa, como’l de tol valle, asitiada mui cerque de delles mines a cielu abiertu, pa la zona de Polio –de la que baxes a la drecha del valle– y de los míticos pozos turoneses, munchos d’ellos pesllaos y que puen vese a la vera la carretera. Una de les razones poles que faigo estes escapaes ye porque me dexen desconeutar y viaxar un poco nel tiempu. Pero ye evidente qu’eso va pasá-y a cualesquier persona que pase per esta zona del valle Turón a poco que repare en daqué cosa. La vuelta al blancu y negru, a los años 70, ye impepinable, afatada amás colos cartelos del PSOE y de IU pa les eleiciones xenerales del 2015.

En Figaréu remata la AS-337. Les ilesies nes Cuenques Mineres nun constitúin el patrimoniu más destacáu, poques gracies. Sicasí, dalgo quedó interesante; pa fincar esta ruta, coles mesmes, podríemos proponer una visita a la ilesia de Samartín de Tours, d’aniciu prerrománicu, a poca distancia de Sotrondiu, y rematala n’Uxo (Mieres), na ilesia de Santolaya, monumentu nacional con importantes capiteles y canecinos románicos. Nós escoyimos pa charrar de la visita comercial que tocaba en Mieres otru templu que ye la Sidrería La Solana, con menú del día afayadiegu, bon tratu y dellos palos de bona sidra, ente ellos Canal o Fonciello.