L’amigu Berto Peña cuntábame que fai non munchu tiempu, en dellos pueblos asturianos, lo mesmo que nel norte de Portugal o dalgunos llugares de Galiza, Zamora o Lleón, cellebrábase per estes feches la fiesta denomada “As fogueiras do natal”. Ye’l contrapuntu a San Xuan, que como ye sabío, vien recordanos que ye la nueche más curtia del añu, mientres que nestes feches d’avientu ye cuando los díes entamen a facese más llargos.

Llarga nueche la de güei, nun sólo porque los ritmos de la naturaleza, que l’home nun puede domeñar, establécenlo asina. Mañana son les elleiciones xenerales. La xente ta esperanzao y nervioso. Y dalgunos tan nerviosos que pretenden controlar la naturaleza a base de prender fogates y  amburiar bosques. ¿Cuála ye la razón?

Güei echamos la cabera función de la ópera “Il Duca d’Alba”. Nel últimu descansu, enantes de salir, lleo nel fb que tan declaraos polo menos 30 fueos n’Asturies, que más tarde sedríen más d’un cientu. Salí del curro pasaes les once la nueche. Sentí la necesidá de facer daqué, quería saber qué pasaba, qué necesidaes había. Les compañeres yá dispusieren una rede de sofitu pa la xente evacuada… Otres acudíen a los incendios… Al paecer los fueos taben concentraos nes fasteres occidental y oriental d’Asturies, Viavélez evacuáronlo, nun sé… Munches noticies. Por cierto, tamién amburiaba La Col.ladiel.la, caleyu que amosáremos nel capítulu anterior. En Xixón había incendiu y fui p’allá de secute.

IMG_20151220_004437

Ruedes ye una prestosa parroquia de Xixón a la que se pue llegar pela Carretera Carbonera, pasando Mareo y la Pedrera. Hai un desvíu a la mandrecha y xúbese una cuesta bien pindia. Nel altu ta la parroquia, espardía per dellos barrios; al pocu de llegar arriba tópeste cola guapa ilesia d’aniciu románicu y l’edificiu de la escuela. Intentara llegar per otru caleyu, ún que xube dende La Pedrera, pue enganchase dende’l chigre Casa Oliva, pero atopéme col fueu, di la vuelta y tiré pola primer ruta. Dende lo alto, que tien el Picu Samartín y Güerces al otru llau del valle, hai unes vistes estelantes de la ciudá de Xixón y de tola rodalada.

Subió Nuria, la nuesa conceyala de XSP, y tuvimos falando colos bomberos y municipales que taben allá nel operativu. Ensin mayores consecuencies, por suerte. Ellos aseguráronmos que l’incendiu yera provocáu. A la de dir a la gueta les causes nun sólo d’esi, sinón de los más de cien incendios declaraos en toa Asturies, nun-y dieron muncha vuelta al son. Dicíen que por descuido de los paisanos que van quemar herba seco, matos y bardiales, y píllalos l’airón esti y prende tou.

Casualmente, el sitiu onde ardía ye un cotaraxu con unes vistes impresionantes. Paez, poles informaciones que van llegando, –non pela TPA, que yá dixo que nun tenía medios pa cubrir ná, nun sé pa qué tan ehí– qu’hai munchos incendios pela costa, tamien en Muniel.los, en Llanes, Cabrales…

IMG_20151220_005543

Itinerariu propuestu: esto ye TERRORISMU MEDIUABIENTAL. Yá se comprobará, pero la mayoría de zones amburiaes son d’interés pa constructores. Hai una llei de montes que permite construir en zones quemaes. Mañana hai elleiciones. Pudiera dase’l casu, oxalá, que salieren escoyíes fuerces polítiques que podríen torgar esa llei. Dalgunos pensaron que valía más curase en salú, y polo tanto, tan quemando’l nuesu país.

El festexu d’As fogueiras do natal tenía una finalidá: apurrir calor y lluz nos díes más escuros del añu. D’ehí fiestes como Sta. Llucía, ente otres. Pero güei Asturies, magar que coincida la fecha, nun ye una fiesta por munches fogueres qu’haya. Ye una catástrofe. De toes maneres, espero que mañana nos vuelva la sorrisa. Que se torgue esa llei. Qu’haya dotaciones con medios afayadizos pa resolver estos tristes episodios. Asturies ye un país persensible a esti tipu de siniestros. Y coles mesmes, que s’investigue que foi lo que verdaderamente ocurrió y cómo ta organizao too esti atentáu; que nun tenga consecuencies pa naide inocente; y qu’a cortu plazu podamos volver a ver los caleyos d’Asturies, como estos tan fermosos de Ruedes y la so rodalada, verdes, como siempres.