La cabera y llamentable novedá que tuvo llugar endientro’l pequeñu universu del teatru asturianu protagonizóla la conceyala cultura del Aytu. de L.lena, d’IU pa más señes, qu’arrenuncia a que’l so conceyu figure ente los que se beneficien de la ufierta del Circuitu Asturianu de Teatru Profesional, un plan que punxo en marcha la Conseyería Cultura del Principáu pa los ayuntamientos asturianos, y que permite llevar teatru profesional costeando namás qu’un 50% del preciu de les actuaciones, al poner la conseyería la otra metá. La inesplicable, inesperada ya incoherente decisión foi retrucada enforma pola Asociación Foroescena, qu’agrupa a la mayoría de compañíes profesionales del sector (de la minoritaria ACPTA nun se supo nada), y polos partidos de la oposición l.lenense. El representante del PSOE llegó inclusive a presentar una moción pa que l’ayuntamientu volviera a formar parte del circuitu, col resultáu que s’amosa nel artículu qu’equí s’apurre:

L’actitú de la conceyala d’IU y la de los sos compañeros y compañeres de partíu abulta impresentable, ye un desbarre, amosa un desconocimientu total de lo que supón la función social de la cultura, ye un despreciu al llabor de les compañíes profesionales, una falta de consideración cola so población y los sos drechos como ciudadanos, y dexa entrever escuros intereses, por casu, suplir la opción profesional pola amateur, más barata incluso. Volveré sobre ello.
No obstante, quixera apurrir una opinión particular sobre l’actitú del PSOE nesti asuntu, que tamién me choca abondo. Preocúpame la rentabilidá política que dalgunos que nunca dieron un duru por nosotros pretenden sacar a costa de nueso. Pa que la so propuesta en L.lena resultare creyible, habría que pedi-y al partíu que nos ámbitos autonómicu y llocal fuera coherente colo qu’agora con tanto enfotu defende. Sobrescobiu, onde gobierna’l PSOE, formó parte del circuitu y agora nun tá. Ye verdá que tien un espaciu pequeñu, pero…  Llaviana,  onde gobierna’l PSOE, nunca tuvo nel circuitu,  pero podía, tien un espaciu afayadizu. Ayer, onde gobierna’l PSOE, va años dexó’l circuitu apostando pol teatru aficionáu, que yera más baratu. Pravia, onde gobierna’l PSOE, tamién abandonó’l circuitu. A Veiga d’Eo, onde gobierna’l psoe, lo mesmo. Amás, el circuitu nun lu inventó’l PSOE, nin muncho menos IU; púnxolo’l PP. Quiciabes el conceyal socialista de L.lena podría recordá-ylo a los suyos,  anque nun creo que lo faga, debasa les sos competencies. Quiciabes debiera la profesión tirar d’hemeroteca y nun sólo d’hemeroteca, y recordá-ylo a toos ellos, y recordá-y al PSOE, coles mesmes, que nun se fizo nada en trenta años dende l’ambitu autonómicu pol teatru profesional asturianu más que retayar constantemente la cuantía de les ayudes. Hasta tal puntu que tamos agora igual qu’en 1995, y nesi añu yá yéremos lo cabero del estáu. Cierto qu’hai agora ciertu enfotu por parte de la conseyería en promocionar el circuitu, y que les rellaciones al menos d’una gran parte de la profesión cola alministración autonómica son bones. La mio opinión particular ye que son parches, pa cambiar esto fai falta muncho más. Espero enquivocame.
Escaecíaseme añadir a la esbilla d’enantes los conceyos de Parres y Piloña,  que dambos son del PSOE y tuvieron nel circuitu nel so momentu. Hai otru ayuntamientu del PSOE, que ye Llanes, que nun merecería tar nel circuitu, por que nun tien instalaciones afayadices, casu contrariu al de L.lena, por ciertu, que tien un fermosu teatru restauráu con fondos públicos. Y otros dos, que son Carreño y Corvera que, magar que tean nel circuitu, apuesten claramente pol teatru aficionáu, aldu que se barrunta que garre L.lena, y que Llangréu yá garró va tiempu, por munchos motivos mui llargos d’esplicar. Otros conceyos interesantes podríen ser Cuideiru y Ribesella,  que nunca tuvieron y podríen; ún del PP y otru de Foro. De Foro tamién Noreña. Y Xixón, d’onde habría muncho que falar. Y escaécenseme dellos más, de xuru. Pero, en suma, el casu ye que nun importamos nada a naide.
Lo d’IU yá entama a ser preocupante. De nada valió la reunión que caltuvo una diputada autonómica del partíu cola conceyala de L.lena a esti respeutu. Tampoco paez que deprendieren nada de cuando se presentó nel parlamentu español una propuesta nel congresu pa equiparar el teatru aficionáu al profesional, que d’aprobase, supondría la desapaición del teatru profesional a nivel estatal. L’erru foi reconocíu pol mesmu Gaspar Llamazares. Y n’Uviéu paez ser que tampoco se dan por enteraos, yá que paez qu’apuesten claramente pol teatru aficionáu (según dixo’l conceyal Rivi nel so día), o por recuperar tradiciones musicales qu’agora tan lloñe de ser populares, produciendo zarzueles de nueva creación, dando exemplu de bon facer al mesmu INAEM del Ministeriu Cultura. Quiciabes l’uvieín seya’l modelu cultural al que se refieren l’alcaldesa y la conceyala de L.lena cuando falen de que quieren facer una “programación teatral de calidá”.
Nun digo que esfuercios como’l que ficieron los partíos de la oposición y l’Asociación Foroescena pa intentar esbrexar dalgo de camín en L.lena sean infructuosos, tolo contrario. Pero pamidea qu’entá queda muncho que facer p’algamar la normalidá del teatru profesional n’Asturies, llevamos perdíos munchos años, y nun solo somos nosotros y nosotres los que se tienen d’esforzar. Tamién ye verdá que parte de la culpa de too esto tenémosla les mesmes compañíes, onde siempres hubo una minoría influyente que s’apuntó al “Virxencina, que me quede como toi”. Y asina nos va. Pero esi ye tema pa otru post.