La cueva'l Guirriu Antón

Tesis/Artículos

1) Testos Dramáticos, Ensayu, Otros

• Termast. Terminoloxía del Teatru y Artes Escéniques. (Con Belarmino Daniel Álvarez) Academia de la Llingua Asturiana. (2014) (Arreyu al espublizamientu na web de l’ALLA: calcar equí )
• Teatru y figures rituales n’Asturies. Ed. La Cruz de Grado (2014)
• Torna y adaptación de la ópera de Mozart Los amorinos de Bastián y Bastiana (2012)
• Política teatral pa países fósiles. Ensayu de política teatral presentáu nel Festival L’Arribada, en Xixón. Ed. Lulú, 2011.
• K. Dramaturxa so la novela ”El proceso” de F. Kafka
• La sierva patrona. Torna y versión n’asturianu del llibretu de la ópera La Serva Padrona, de Giacomo Battista Pergolesi. En Lliteratura. Revista lliteraria asturiana, nº 35, pp. 120 y ss. Uviéu: ALLA (2019)

2) Tesis y artículos derivaos

La mio tesis “Bases pa un corpus de teatru n’Asturies” nun ta editada como tala; sicasí, ta allugada n’Investigo. repositoriu institucional de la Universidá de Vigo, y pue consultase, xunto a una copia iguada, nel enllaz http://hdl.handle.net/11093/1351. Asoleyáronse delles espublizaciones afitaes nel so conteníu; a estes altures pue dicise que’l cogollu teóricu de la Tesis (definición de Teatru Nacional Asturianu, afondamientu na so historia, llendes y ámbitu del Corpus, base etnodramática y base ilustrada), que ye lo que concasa colos capítulos 0 y 1, ya tá asoleyáu o tien comprometíu’l so asoleyamientu d’equí a poco.

Na ponencia “Propuesta pa un Corpus de Teatru y Artes escéniques asturianu. Bases y perspeutives”, que se presentó nel añu 2016 nes XXXV Xornaes Internacionales d’estudiu de l’ALLA, y que va editase próximamente na revista Lletres Asturianes, plantéguense toos esos conceutos anteriormente citaos.

L’artículu “El teatru ritual como ún de los principios básicos de l’actividá teatral n’Asturies”, que concasa col capítulu 1 de la tesis (vien a ser la primer parte del capítulu), pue topase tamién na revista Lletres Asturianes, nel nu. 117, Uviéu, ALLA, px. 181-204. Pue descargase del enllaz El teatru ritual como ún de los principios básicos de l’actividá escénica n’Asturies

Tamién la segunda parte del capítulu 1 ta asoleyada. L’artículu «El teatru de La Ilustración como ún de los principios básicos de l’activida escénica n’Asturies«, pue atopase na Revista Lletres Asturianes, nu. 118, Uviéu, ALLA, 2018, px. 117-133. Pue descargase del enllaz El teatru de la iIlustración como ún de los principios básicos de l’actividá escénica n’Asturies

Queda entá munchu conteníu por asoleyar, que ye lo que correspuende al analís propiamente sociocultural de tol percorríu del Teatru Asturianu dende’l so aniciu (l’intérprete, xéneru, valores, tresmisión, asociacionismu) hasta la so perceición social más amplia (memoria, política cultural).

De toes formes y pali que pali van dándose-y salida a dellos conteníos. Por casu, el capítulu que concasa col analís del asuntu de xéneru (2.6, Teatru asturianu y xéneru), presentóse como comunicación nos V encuentros Feminismo y teatro qu’entamó la RESAD de Madrid, en febreru de 2018, y ta espublizáu na Revista Acotaciones, nº 41. Lleva’l títulu «Acceso de la mujer y tratamiento de lo femenino en el Teatro Asturiano. Antecedentes, protagonistas, visibilización«. Preséntase en castellán, abondo resumíu en comparanza cola tesis, magar que concentráu y válidu. Apurriráse una torna al asturianu. Pue descargase d’esti enllaz: Acceso de la mujer y tratamiento de lo femenino en el Teatro Asturiano. Antecedentes, protagonistas, visibilización.Per otra parte, espublizóse nel Boletín nº 70 de l’Asociación de Profesionales de la Narración Oral de España l’artículu «Silencio pido señores». Breve relato de género en el teatro ritual asturiano, que vien a complementar l’anterior.  Pue descargase nel siguiente arreyu: silencio-pido-senores-breve-relato-sobre-genero-en-el-teatro-ritual-asturiano

Nesi mesmu sen yá ta asoleyáu’l capítulu “Memoria coleutiva y teatru asturianu”, que correspuende col sétimu capítulu de la tesis y que pue topase en la Revista Lletres Asturianes, nu. 116. Uviéu: ALLA. 2017, px. 151-192. Pue descargase del enllaz Memoria Coleutiva y Teatru Asturianu.

Nel cuadru que sigui darréu fáise un resume de los artículos, ponencies y comunicaciones, asoleyaes y por asoleyar, y del so asitiamientu na Tesis.

D’otramiente, tamién ta previsto que s’edite l’artículu «Una güeyada a la traducción de testos dramáticos al asturianu«, que nun forma parte de la Tesis y que foi presentáu como comunicación nes XXXVI Xornaes Internacionales d’Estudiu de l’ALLA (2017). N’espublizándose tamién podrá atopase equí un enllaz.

orcid.org/0000-0003-1226-628X

Tamién puen atopase nel índiz de Dialnet