Inicio

Teatru asturianu de raigón

Deja un comentario

En cuantes que l’asuntu d’una amuesa artística cualisquiera tea venceyada a la cultura propia d’un territoriu,  que pue tar o non, pue falase de teatru con una identidá. Ye evidente. Esa identidá, nel teatru y artes escéniques pue dase de munches formes; ocúrreseme agora los testos dramáticos dende un puntu de vista dramatúrxicu, la recuperación y tratamientu d’asuntos históricos de la comunidá, o la crítica a los vezos y costumes sociales recientes, y yá, partiendo de l’antropoloxía, l’averamientu a les formes escéniques tradicionales dende un puntu de vista de recuperación y la so reutilización, y el procesu contrariu: partir de lo contemporáneo pa llegar a lo tradicional. Esto ye, en pallabres de Adolfo Camilo (2002, 97), “el teatru nacíu nun territoriu detemináu que fai por desplicar los porqués del mesmu a partir de les sos peculiaridaes”. Equí entra too: etnodrames, teatru relixosu, costumismu, contemporáneu, toles categoríes; pero que se tenga fecho n’Asturies o a partir de la so realidá, y que tenga que ver col so ámbetu xeográficu, la so cultura en xeneral, los sos conteníos sociales… La so identidá. Tamién podría ser el teatru de fuera d’Asturies, pero que tenga que ver cola nuesa realidá cultural, de dalguna forma.

En too casu, naide me va quitar de la cabeza que trabayar nestos ámbetos de lo cultural y lo identitario ye dalgo que depende de la voluntá de quien lo faiga y tamien de la ideoloxía. Nun too va ser por perres, evidentemente, magar que nun les haiga; habrá que tener dalgo d’ética. Pa mín, nun se pue facer teatru asturianu de raigón si nun tas a favor de la oficialidá, o si non se caltién un mínimu compromisu con una causa cultural xusta y, nesti casu, minorizada. Sedría lo mesmo d’honesto que si una persona ye homófoba se punxera a facer una obra pal Arguyu gay. Si nun se parte d’una ideoloxía, o d’una ética, ye fácil cayer nel oportunismu.

Caún ye llibre de facer lo que quiera, eso tá claro. Y allégrome que munchos compañeros y compañeres se dean cuenta agora qu’hai una estaya na que trabayar perimportante pal nuesu país (yo nun soi de Foro nin de coña, pero abúltame curioso qu’agora pa ellos y elles seya’l momentu indicáu, paez ser que’l pensamientu asturianista personalizáu en Carlos Rubiera o Vallaure cuayó y caltrió na sociedá a ciertos niveles ¿o non?), y de qu’esto seya una oportunidá de negociu, poques gracies.

Nosotros llevamos dende 1995 faciéndolo davezu, tanto que la investigación sobre nueves formes escéniques, la revisión antropolóxica o l’anovamientu de formes tradicionales constitúi una exa perimportante, y non la única, del nuesu llabor profesional. Poro, nun somos namái que nós; el grupu Telón de Fondu por exemplu lleva tola vida faciendo teatru n’asturianu col envís d’amuesar que la llingua ye valible pa representar lo que seya; Margen, y enantes Caterva, nos sos entamos ficieron montaxes sobre la hestoria asturiana, y retratos de la sociedá de la dómina; Nel Amaro, el mesmu Dolfo Camilo con Güestia…

A los demás nun sé, pero la nuesa esperiencia, que siempres atopó pilancos nuna alministración, casi siempres socialista, que nunca sofitó l’espoxigue nin el trabayu cultural identitariu por consideralu un pelligru pal sistema –a esto llega’l complexu d’inferioridá– nunca tuvo pa nos la suficiente reconocencia a nun ser d’un públicu mui específicu; yéremos una especie de frikis asturianiegos, la xente riíase de nós, nun te teníen en cuenta…

Nun queremos metenos con naide, sólo naguamos por tar nel sitiu que nos correspuende. Y como a testerones nun mos gana naide, llevamos munchu tiempu nesta xera, y abúltamos qu’hai un garrapiellu de xente nel seutor que piensa, agora que s’enteraron de qu’esiste, de qu’esti ye´l momentu de trabayar na estaya del teatru asturianu con raigón (nun sé porqué agora y non enantes, insisto) y qu’amenacien con constituíse n’élite abanderao del asturianismu nel teatru, vamos facer lo posible por espardir nes redes sociales el nuesu trabayu fechu dende fai más de quince años que pueda considerase Teatru Asturianu de Raigón. Igual paga la pena. Qu’ustedes lo disfruten.

 

Notes sobre Receición del espeutáculu “Los amorinos de Bastián y Bastiana” (Xixón, 26/7/12)

Deja un comentario

El pasáu Xueves 26 echóse, endientru los actos del Festival del Arcu Atlánticu de Xixón, y organizao pola Asociación L’Arribada, la ópera “Los amorinos de Bastián y Bastiana”.

L’Arribada ye, nesta edición del Festival, l’asociación qu’entamaba la exa de la programación venceyada cola lliteratura, cine ya teatru, y consideró oportuna la inclusión d’esti espeutáculu endientro les actividaes del Festival.  por consideralo d’interés llingüísticu y escénicu.

La función representóse nel patiu del C.C.A.I., felizmente recuperáu pa teatru –magar que nun tien de momentu les condiciones téuniques nin de personal necesaries pa un espaciu destináu a la representación.

El patiu de butaques –silles– taba atarraquitáu de xente que disfrutaron d’una bona representación, que nun tuvo mayor variación téunica al respeuto de les anteriores a nun ser nel aprofitamientu del espaciu arquiteutónicu como espaciu escénicu. El públicu pal que s’ufierta la obra yeĺ familiar, pero nesta ocasión, al tar ufiertáu como actividá del Festival, el públicu yera más bien adultu y mui variao.

Image

Sí que tenemos la sensación de que la función tuvo una necesaria trascendencia; había muncha xente conocío endientro’l público –hasta’l momentu y dempués de trece funciones, nun viera l’espeutáculu naide rellacionao cola profesión teatral (del ámbetu del cantu sí), a nun ser dos compañeros en la función de Caxastur-Xixón–, tamién programadores, téunicos de la FMC de Xixón y persones responsables de la política cultural del Conceyu, como el Conceyal de Cultura Carlos Rubiera o el Direutor de la FMC Xose Nel Riesgo. El montaxe, polos comentarios que nos ficieron en finando la representación, resultó-yos perprestosu, yá inclusive interesáronse pol desendolque de la xera d’espardimientu del mesmu pa otros públicos, conceyos, ya eso.

Image

Tamos mui agradecíos pola asistencia de públicu y polos comentarios fechos al rodiu del mesmu; esto ye la receición por parte del públicu del montaxe. Camentamos que ye un tipu d’espeutáculu que nun se ve davezu, ye una ópera, y la ópera ye caro, y nun suel amuesase gratuítamente n’espacios dependientes de lo público, –esto ye cases de cultura, o por colexos–; y tamién camentamos que ye una propuesta arriesgada nel sentíu social, yá que ye la primer vegada que se representa una ópera n’asturianu, y el tema del idioma ta abondo politizao y entá sigue provocando polémiques inútiles y nun deseyables, por disgracia pa to@s. Asina y too, naide fizo denguna crítica por tar tornada la ópera al asturianu, y asumióse con plena naturalidá, como tien de ser, como tamién tuvo bona acoyida la propuesta de direición, venceyando la ópera orixinal cola cultura ya hestoria asturianes, dende’l rigor y el respetu.

Lo que sí nos paez ye que nun algamamos presencia nos medios de comunicación, a los que se-yos unvió tola información al rodiu del montaxe, lo que choca cola importancia qu’al menos pa nós tien esta propuesta; eso va en perxuiciu, en principiu del públicu, que desconoz la ufierta, y dempués de la compañía, que nun ve amortizáu’l so trabayu, magar qu’esta vegada sí qu’hebio abonda asistencia de públicu.

Ello pue debese a delles causes: una, la mui poca visibilidá y espardimientu que tien el teatru profesional endientro los medios de comunicación; o a les rellaciones ente los medios y la organización del Festival; o a que nun se distingue la propuesta endientro una programación mui variada, pueque.

Esperamos que pa futures representaciones podamos ser quién a iguar esti problema col que nos atopamos; pa que la receición del epeutáculu seya positivo, o más positiva, namái queda facer munches más fuciones, algamar esa presencia nos medios, y que se programe n’otru contestu estremáu de los circuitos habitales d’amuesa d’espeutáculos. D’esto, que tamos intentando negociar, daremos cumplida cuenta nel so momentu.

FICHA TÉUNICA

Títulu:”Los amorinos de Bastián y Bastiana”

Compositor: W.A. Mozart

Xéneru: Ópera (singspiel)

Domina y llugar : C.C.A.I. Xixón, Patiu, 26/7/12, a les 19 h.

REPARTU (nesta función):

Bastiana: Vanessa del Riego

Bastián: Pablo Romero

Colás: Antón Caamaño

Pianista: Mario Álvarez

Espaciu escénicu: Pablo Maojo

Ayte. Direición: Inma Rodríguez

Torna, Dramaturxa y Direición d’escena: Antón Caamaño

Produción, xestión y espardimientu: PRODUCCIONES NUN TRIS

Image