Inicio

Selmana de les lletres en lluna llena

Deja un comentario

Güei yá ye sábado 5, tenía ganes de que llegare; contaba quedar na cama tres díes de siguío, pero yá me llevanté sobre les once y fici nun se cuántes coses.

La verdá que toi contentu, yo y pémeque Inma tamién. L’actividá estos díes pa nós foi ablucante. Yá veníemos de facer el Criáu nel Filarmónica y lo de Bastián y Bastiana en L’Entregu; en cuatro díes adatación d’un clasicu asturianu a teatru contemporáneu; dos díes de presentación y amuesa de trabayos d’escolinos sobre la Ilustración, el resultáu d’un trabayu de dos meses de sesiones preparatories nos centros; una presentación d’un concursu y pa rematar dos bolos de Bastián y Bastiana.

Nun debe ser la primer vez que mos toca facer dalguna heroicidá asina en quince años, pero yo yá nun m’alcuerdo cuala foi la cabera vez. En too casu, magar qu’Inma y yo tiremos d’esti carru, ye munchu más cenciello y mui prestoso facelo cola ayuda de xente como, nesti casu, Izar, Rodri, Sandra, Vanessa, Pablo o Manuel, y con muncha otra que siempres t’anima a siguir.

La pena que tengo ye qu’esti esfuerciu de toos y toes tenga tan pocu espardimientu; nun ye proporcional nin lóxico. Sedría necesaria una continuidá na amuesa de los trabayos, una difusión afayaiza. Camiento, y dígolo sinceramente y con tola modestia, que nun son trabayos cenciellos de facer, que sinifiquen dalgo endientro la cultura, la llingua y el teatru asturianos; y que si lo qu’intentamos ye abrir puertes y desendolcar la nuesa cultura arriqueciéndola con nueves propuestes, pues ye dalgo frustrante que nun s’abran, que nun se sepa, que nun figure en dengún llau, que nun-y importe a naide. A les funciones, sacante la primera de Nava, vieno mui poca xente. Esperamos que más públicu pueda disfrutalo, magar que sé qu’eso nun va pasar a curtiu plazu.

Pues quería descansar, pero güei tuvimos ponemos con otru proyeutu pal San Xuan, y otros pa mercaos, que nun pudimos facer la selmana pasada; tengo d’iguar l’escritoriu de casa que paez que pasó la cicloxénesis, y tengo ganes de retomar lo de la tesis, lleer tranquilu ya escribir un pocu. Pero sobre too, deseyo, pa mín, pa Inma, pa los que trabayen con nós y pa los y les que puedan disfrutar del nuesu trabayu, que vengan esti añu, polo menos quince selmanes como ésta.

Y nun sé por qué razón estos acontecimientos coinciden casi siempres cola xubida de la lluna…

Bederres

Deja un comentario

Toi dalgo tristrucu. Nun foi bona nueche la d’ayeri. O polo menos foi bona fasta que dexó de selo. Facía tiempu que nun me pasaba. La última engarradiella na que me vi metíu foi nuna discoteca en Candás cuando cuntaba diecisiete añinos; y vime metíu, ensin comelo nin bebelo. Como ayeri. Dí tu qu’ayeri nun llegó nin a engarradiella, la griesca quedó neutralizada enantes de qu’entamara. Pero fastídiame que vengan a insultame y a agredime a mí y a los míos no que yo considero la mio casa.

Foi más que nada l’anéudota, que quede claro. Nun pasa nada. Yo conocía al interfeutu y al so collaciu, qu’amás salió tamién na nuesa defensa. Por resumilo, la cosa ye que xurdió’l tema políticu. Ellos, fasta onde yo llego, son simpatizantes d’un partíu tamién nacionaliegu, pero que nun ye’l de mió. Yo, enantes de qu’aquello españara, intentaba argumentar coses, y despliqué-y que yo presentárame na llista’l BA-UNA-LV, pero pamidea que nun m’entendió o nun me quixo entender, o entendiólo como provocación, cosa que nun foi la nuesa intención nin muncho menos.  L’interfeutu, qu’amás camiento que nun tien unes idegues mui estremaes de les míes, acabó llamándome español de mierda delles vegaes y quixo pegame; pero nun llegó a nada, yá vos digo, l’intentu foi neutralizáu –y yá vos cuntaré cómo foi, que tuvo la so coña.

Foi l’anéudota, y quedaríase neso, y nun escribiría nada; pero tien un trasfondu abondo perversu. Y eso ye lo malo. Quedéme un poco atristayáu, la verdá. Nun por nada, pero paezme que yá me merezco dalgo más. Naide tien porqué sabelo, pero llevo tola vida pasu ente pasu, intentando sobrevivir ensin contradecime nin vendeme escesivamente, intentando polo menos ser un poco consecuente, ya naguando por meyorar el mio entornu llaboral y social. Nunca tuvi militancia política denguna, collaboré davezu con partíos y asociaciones de la izquierda y del asturianismu, y nesta pasada campaña, averéme al BA-UNA porque paezme que, caún o caúna a la so manera, ye perbona xente, y porque creo que pienso bastante paicío a lo que piensen elles y ellos. (Esto nel capítulu de l’autoestima, que ye importante).

Los resultaos algamaos nes elleiciones nun fueron lo que nos figurábemos que diben ser. Por munches coses. Nin los de les primeres elleiciones y munchu menos los de les segundes. Creo que l’esfuerciu y la ilusión nun se vieron recompensaos pa nada. Fales, discutes, cavilgues, busques porqués… hai munchos. Pero ún d’ellos apaicióseme en vivu y en direutu delante los morros ayeri pela nueche.

Yo siempres glayé munchu y sigo glayando escontra los partíos españoles y concretamente del PSOE y el so candidatu Javier Fernández pol so desprecio a lo asturiano y a la xente que defendemos esta opción política; llegó a llamanos terroristes. Pero de la misma manera, nun podemos dexar que s’identifique el nacionalismu asturianu cola macarrada y el matonismu de chigre. Nun podemos quedanos en ser dalgo residual, bederre y barriobaxero cara a los güeyos del personal. Nun podemos proponer futuru pal país dende’l complexu d’inferioridá, nin dende l’agresividá.

Seique na Andecha hai bona xente, tengo collacios y collacies de l’Andecha, a quienes respeto ya incluso admiro. Pero camiento, y ye una opinión dafechamente personal, que, si lo que quieren ye facer política, deberíen camudar les sos estratexes y revisar dellos de los sos mensaxes. Les persones, los votos y la confianza qu’esti proyeutu políticu necesita xenerar hai que buscalos notros sitios que nun son l’Andecha. Oxalá m’enquivoque.

Y dalguién debería pedime disculpes, nun sé…

Hamlet y les eleiciones n’Asturies.

1 comentario

Hamlet (a Ofelia): Yá sentí falar de les vueses pintures: Dios dióvos una cara, y vos facéis otra.

De los preseos que s’empleguen davezu pal oficiu teatreru, tolo que ta venceyao a la estaya de maquillaxe y/o carauterización ye lo que me dá más perceguera. Nun lo soporto. Ye raro ahora actuar, pero cuando me tocaba actuar, yera mui raro que me maquillara. Los brillos de la cara, los colores, los güeyos, los focos, dábame igual; si podía, m’escaqueaba. Cosa que nun puedo facer agora que los comediantes son otros. Prestaríame escaqueame de les elleiciones. Dánme perceguera, por munches coses, pero entre elles pol abusu de maquillax de los candidatos y candidata qu’ocupen espaciu na prensa y medios de comunicación, y qu’amás “sal-yos a coste cero”. En fin.

Mercedes Fernández “Cherines” ye vieya conocía. Quiero dicir que fai tiempu que la conocemos. La verdá que, salvando les distancies polítiques y afectives, ye una muyer que, sinceramente, paezme atractiva –algún defeutu tenía yo que tener–; dende llueu ye la que me paez más atractiva de los candidatos con espaciu na prensa. Amás paez que colos años va ganando na imaxe de seriedá y la capacidá de xenerar confianza nel so ellectoráu, pesie a  la capa d’enllucimientu de tres centímetros qu’algama remocicala unos añucos –insisto que paezme que ta estupenda. Vivimos nesa época de la eterna xuventú y primaverización de la sociedá, na que va incluyío’l querer facenos creyer que ye meỳor, pesie a que son eleiciones autonómiques, que nos gobiernen dende Madrí como al restu d’españoles, o que nel teatru toes tenemos que ser Arturo Fernández y tener munchu ésitu. Incluso amenaza con volver a vivir n’Asturies.

Javier Fernández ye lo más. Porque tres d’esa apariencia de galán de guestern de la Cuenca escuéndense non pocos años d’edá; detrás de los centímetros de maquillaxe escuéndense fondes feríes de munches batalles internes; dulcifica una cara mui dura, necesaria pa presentase como alternativa segura depués de qu’el so partíu fuera l’encargáu xunta otros d’esfelpeyar dafechu’l nuesu país, y que tamién escuenden l’ascu que tien por cualaquier cosa qu guela a asturiano. El so sitiu nun tá equí, ye evidente, pero disimúlalo.

De Jesús iglesias, magar que me caiga bien personalmente, tengo dicir que tien un maquillaxe discretu; yá hai protagonistes dende la supuesta manzorga que dan l’alternativa, y él ye como’l secundariu. Como’l secundariu de tola vida. Y sigui nes sos trece, yá mos amuesó les sos intenciones de pactu. Y que ye más importante falar de la crisis y del trabayu que de la cultura asturiana, como si fueren coses incompatibles. En fin, previsible.

Ye abondo sinificativo qu’esta fin de selmana vinieren los tres líderes de PPSOE+IU xuntos dende Madrí nel mesmu avión. ¿A contanos qué? ¿A falanos d’un asuntu tan importante, que nun digo que nun lo sea, como’l copago? ¿Asturies nun tien problemes que solucionar aparte d’esi d’ambetu estatal? ¿O ye que quiciabes ellos si quieran solucionar problemes a nivel estatal colos votos de los asturianos, por exemplu la representatividá ya imaxe de los partíos estatales? Ellos vienen equí de fin de selmana a fartucase, y a dicir chorraes nes fiestes de los sos collacios-es, pero nós tábemos equí yá…

Bono, Cascos creo que tamién taba. Creo. Anque n’eso Cascos nun entra. La mázcara de lo asturiano asítialu n’otru llau. Yo creo que Cascos amás de maquillaxe y gomina pa la entrevista con Ana Pastor, debe llevar botox, pa intentar xustificar lo inxustificable, pa disimular el desgobiernu y la falta capacidá. Y traxe de paisanu normal p’andar per Asturies, magar que lo del país asturianu siéntese cada vegada menos.

Y pa finar colos partíos estatales, falar de Nacho Prendes, que nun-y fai falta maquillaxe, anque lu lleve, p’amuesar qué alternativa propón el so partíu. Ynestrillas amuesó’l so enfotu nesta alternativa y por si fuera poco propón acabar col sistema autonómicu, diz que l’asturianu ye un pilancu pal progresu y no cultural propón qu’el Niemeyer valga pa la entrega los Premios Príncipe. Si nun hai espaciu nel escenariu, home… Y nel escenariu políticu autonómicu tampocu debiera haber espaciu pa una alternativa tan ultra, oportunista, cuestionable y ayena totalmente a nós.

  • Hamlet: Sois honesta?
  • Ofelia: ¡Señor!
  • Hamlet: ¿Sois bella?
  • Ofelia: ¿Qué quier dicir vuesa alteza?
  • Hamlet: Que si sois honesta y bella, la vuesa honestidá nun debiere almitir tratu cola vuesa belleza.
  • Ofelia: Señor, ¿podría la belleza almitir meyor tratu que cola honestidá?
  • Hamlet: Sí, daveres; porque la fuerza de la belleza camudará a la honestidá nuna furcia enantes que la fuerza de la honestidá seya quién a camudar a la honradez a la so semeyanza. Enantia, esto foi una paradoxa, pero agora’l tiempu amuésalo.

Una belleza, de botox y d’afeites, que nun ye honesta, porque anque quier convencenos de que quieren solucionar los nuesos problemes, nun aporten nin una solución. Una máscara que quier dar apariencia de mocedá a les mesmes alternatives polítiques de tola vida, son los mesmos de siempres, y nun van facer nada como siempres. Y por eso me dan perceguera, porque hasta pa eso tamos condicionaos, tamién cola inestimable ayuda de los medios de comunicación, por supuestu. Estes eleiciones –y mira que nun me presta nada empegar llinguaxe teatral pa falar d’otra cosa que nun seya’l mio oficiu– son una farsa grotesca. Nun hai futuru dengún con esta xente, con estos mazcaritos.

  • Hamlet: (a los cómicos): …nun rebases la moderación de la Naturaleza, pues cualaquier cosa qu’asína se desaxere, apártase del pruyimientu del teatru, cuya fin, nel entamu y agora, yera y ye, por dicilo asína, caltener l’espeyu a la Naturaleza, amuesando a la Virtú la so propia fegura, al Viciu la so propia imaxe, y a la dómina y conxuntu del tiempu la so forma y güelga.

Y ye asina, a mí gústame’l mió país. y quiero trabayar nel mio país y pal mió país. Y colo que me encuentro ye con tolo contrario, nun puedo facer nada d’esto. El mio país dame a veces ascu; apetez colar pa onde seya. Sé-sabemos perfechamente de quien foi la culpa de tar asina, nun pasáu reciente y remotu, y tan obligándonos a siguir aguantándolos, nun quieren dexanos alternativa. Parte del proyeutu del estáu p’Asturies ye camudar el paraísu natural por un vertederu estatal. Enllenar les ales despoblaes d’ocalitos nittens. siguir faciedo chiringuitos, d’un llau o d’otru. Ensin falta d’eleiciones yá tienen repartíu’l pastel, yá se sabe quién va pactar con quién pa qu’Asturies nun dea problemes nel Estáu, y puedan siguir chupando, fundiendo esta comunidá, y siguir anulando la nuesa identidá. Pallabres, pallabres, pallabres… Ye patético.

La cosa ta na nuesa manu. Pémeque ye necesario que veamos la necesidá de camudar el sintíu del votu, de construir una alternativa nuesa, seria, discreta, honesta y bella. Y hai alternativa, anque nun la queramos ver, anque mos dea mieu lo supuestamente desconocío, anque los medios de comunicación nun la publiquen, anque nun lleve maquillaxe. Yá toquemos fondu, y yá somos mayorinos.

  • Hamlet: Ser o nun ser: esa ye la custión; si ye más noble sofrir nel ánimu los tiros y flechazos de la insultante Fortuna, o alzase n’armes escontra una mar d’axitaciones, y dándo-yos cara, acabales.

Yo voi votar distinto. Yo voi votar BA-UNA-LV. Ye lo único que me presta.

Antroxu 2012. A entamar otra vegada.

Deja un comentario

Antroxu ye dómina de cambéu, de trasgresión, d’anovamientu.

El Guirriu Antón tuvo de camudar de direción de blogue; nireblog yá nun furrula y garró ésta. Volvióse chifláu pa copiar los conteníos qu’había nel otru blogue, pero nun foi quién.

Pali que pali dirá llantando cosuques de lo que tien perehí guardao, articulinos, entrevistes y demás.

Y de mano a ver si se-y da bien furrular con esti sistema nuevu…

Newer Entries