Inicio

Capital social del teatru asturianu. Namái qu’una vuelta a los nomes de los grupos asociaos.

Deja un comentario

SOLÁ i GUSSINYER (*) propón pal analís de la sociabilidá y del asociacionismu, ente otres, esta categoría d’analís. Tratase de deducir namái qu’a partir del analís del nome d l’asociación, la so naturaleza, oxetivos, ideoloxía, ámbetu… Paicióme cenciello ya interesante. Allá va. Esbillaránse les asociaciones sindicales, empresariales y tamién habrá una referencia pa compañíes y grupos aficionaos. Entá falten dalgunes, pero paécenme les más rellevantes.

La U.A.A. (Unión de Actores de Asturias) ye una organización gremial y de calter sindical, calter esti que nun se deduz del nome; si que se deduz les intenciones de xunir al gremiu. El nome ta inspiráu nel que teníen otres asociaciones asemeyaes del estáu, por exemplu la Unión de Actores (Madrid). L’ambetu d’actuación sí ye evidente. Y el nome queda un poco desfasáu en cuantes a les tendencies del llinguaxe al respeutive del xéneru; “Actores” equí atropa a actores y actrices. Otres asociaciones asemeyaes del estáu sí que camudaron el nome, mientres la U.A.A. quedó tal y como taba. Magar que’l nome ye correutu en castellán, yá que permítese’l masculín xenéricu, paezme que yá nun ta mui al tenor de los tiempos a esi respeutu.

A.C.P.T.A. (Asociación de Compañías Profesionales de Teatro y Danza de Asturias) ye una siegla, y tampocu se deduz nada a partir del nome a nun ser el fechu de que ye mui paicío a otres de la mesma y/o estremada naturaleza, y llama a la confusión. Va acopangada de la desplicación de la siegla, que sí que tien un nome mui precisu y que define bien la so naturaleza (profesional) y l’ámbetu territorial. Dicir qu’al cabu los tiempos fueron apareciendo nueves compañíes hermanes de les de teatru, esto ye de danza, y entamó a usase el términu más xenéricu de Teatru y Artes Escéniques. A.C.P.T.A. quixo amuesar la so sensibilidá haza esti socedíu, y nun camudó la siegla, pero faise nomar Asociación de Compañías Profesionales de Teatro y Danza de Asturias. Insisto nel fechu de qu’hai asociaciones nel estáu que, como nel casu de la U.A.A., tienen nome asemeyáu; y claramente nun hai denguna referencia a la cultura asturiana, ta rexistrada en castellán.

La denominación FOROESCENA resúltanos daqué ambigua; destaca más el gremiu al que pertenez que la natauraleza de l’asociación, que ye’l mesmu que nel casu d’A.C.P.T.A. Parez querer tresmitir un espíritu aperturista; tampoco dexa claro la naturaleza de la’Asociación, y nun hai denguna referencia al so ámbetu, Asturies; nin tampoco n’asturianu.

Nel casu de les plataformes, como exemplos d’asociacionismu espontáneu, l’actividá que xeneren ye más puntual, y curtia nel tiempu; el nome de la plataforma Cultura para el Arango ye abondo esplícitu y concretu. Nel casu de “Yo apoyo al teatro profesional asturiano” el nome ye mui xenéricu, quiciabes deliberadamente –lo mesmo que la plataforma Yo apoyo al Centro Niemeyer, quiciabes fonte d’inspiración; ye raro que dalguién nun apoye al teatru profesional, colo cual puede llegar a muncha xente con más o menos implicación; queda claro tamién l’ámbetu asturianu, pero nin la naturaleza, nin la ideoloxía, nin los intereses concretos de la plataforma, que son más que los qu’indica el nome.

El casu de FETEAS ye diferente: según la web de l’asociación (www.feteas.org), consultada en 14/8/12) el nome FETEAS vien a querer dicir Federación de Grupos de Teatru Amateur del Principaú d’Asturies, pero la siegla nun tien ná que ver cola desplicación posterior amestada. (Quiciabes, habría que consultar el rexistru d’asociaciones, n’orixe quixera dicir FEderación de TEatru ASturianu, pero la denominación nun s’axustaría nin a lo que ye l’asociación nin a la realidá). La desplicación si esclaria la natura, el calter aficionáu y l’ambetu territorial.

  • Idioma

Tolos nomes tan rexistraos o furrulen en castellán, y los sos estatutos, de tenelos, lo mesmo. Namái que la U.A.A. furruló un tiempu col nome tornáu (Unión d’Actores d’Asturies), y la Plataforma Cultura para el Arango furrulaba tamién como Cultura pal Arango

Esti mesmu analís idomáticu vamos llevalu al nome de les compañíes y grupos (**): del censu ellaboráu por Boni Ortiz (2012: 183, 185-187), tres de les 39 profesionales tienen la denominación n’asturianu (El Ñeru Los Coríos, A Baxu Costu Teatru y Producciones Nun Tris); y 8 de 46 aficionaes (nel casu de Xana, La páxara pinta, El refaxu, La Fumarea, Traslluz, y Les filanderes, el nome vien ente comines, y cola denominación Grupo de Teatro en castellán; otros yá tienen el nome direutamente n’asturianu, como N’alpargates y orbayando, o Telón de Fondu, magar qu’esti últimu nel censu de Boni Ortiz venga na so aceición castellana.

Quiciabes seya lo normall, yá que l’asturianu nun ye oficial y ye una llingua minorizada y persiguida; pero los resultaos d’esti pequeñu analís, o observación, amuesen mui poco compromisu del seutor pa cola realidá lligüística y cultural llariega y coles demandes sociales.

(*) SOLA I GUSSINYER, PERE (2003) “Asociacionismo en la España periférica, Tipología y rasgos dominantes”. en E. Maza Zorrilla (coord) Asociacionismo en la España contemporánea. Vertientes y análisis multidisciplinar. Valladolid: 2003

(**) Datos recoyíos en ORTIZ CABELLO, BONI (2012). Anuario de Teatro de Asturias. Ed. Más teatro. Xixón: Apel. Px 183 y ss.

Teatru asturianu de raigón

Deja un comentario

En cuantes que l’asuntu d’una amuesa artística cualisquiera tea venceyada a la cultura propia d’un territoriu,  que pue tar o non, pue falase de teatru con una identidá. Ye evidente. Esa identidá, nel teatru y artes escéniques pue dase de munches formes; ocúrreseme agora los testos dramáticos dende un puntu de vista dramatúrxicu, la recuperación y tratamientu d’asuntos históricos de la comunidá, o la crítica a los vezos y costumes sociales recientes, y yá, partiendo de l’antropoloxía, l’averamientu a les formes escéniques tradicionales dende un puntu de vista de recuperación y la so reutilización, y el procesu contrariu: partir de lo contemporáneo pa llegar a lo tradicional. Esto ye, en pallabres de Adolfo Camilo (2002, 97), “el teatru nacíu nun territoriu detemináu que fai por desplicar los porqués del mesmu a partir de les sos peculiaridaes”. Equí entra too: etnodrames, teatru relixosu, costumismu, contemporáneu, toles categoríes; pero que se tenga fecho n’Asturies o a partir de la so realidá, y que tenga que ver col so ámbetu xeográficu, la so cultura en xeneral, los sos conteníos sociales… La so identidá. Tamién podría ser el teatru de fuera d’Asturies, pero que tenga que ver cola nuesa realidá cultural, de dalguna forma.

En too casu, naide me va quitar de la cabeza que trabayar nestos ámbetos de lo cultural y lo identitario ye dalgo que depende de la voluntá de quien lo faiga y tamien de la ideoloxía. Nun too va ser por perres, evidentemente, magar que nun les haiga; habrá que tener dalgo d’ética. Pa mín, nun se pue facer teatru asturianu de raigón si nun tas a favor de la oficialidá, o si non se caltién un mínimu compromisu con una causa cultural xusta y, nesti casu, minorizada. Sedría lo mesmo d’honesto que si una persona ye homófoba se punxera a facer una obra pal Arguyu gay. Si nun se parte d’una ideoloxía, o d’una ética, ye fácil cayer nel oportunismu.

Caún ye llibre de facer lo que quiera, eso tá claro. Y allégrome que munchos compañeros y compañeres se dean cuenta agora qu’hai una estaya na que trabayar perimportante pal nuesu país (yo nun soi de Foro nin de coña, pero abúltame curioso qu’agora pa ellos y elles seya’l momentu indicáu, paez ser que’l pensamientu asturianista personalizáu en Carlos Rubiera o Vallaure cuayó y caltrió na sociedá a ciertos niveles ¿o non?), y de qu’esto seya una oportunidá de negociu, poques gracies.

Nosotros llevamos dende 1995 faciéndolo davezu, tanto que la investigación sobre nueves formes escéniques, la revisión antropolóxica o l’anovamientu de formes tradicionales constitúi una exa perimportante, y non la única, del nuesu llabor profesional. Poro, nun somos namái que nós; el grupu Telón de Fondu por exemplu lleva tola vida faciendo teatru n’asturianu col envís d’amuesar que la llingua ye valible pa representar lo que seya; Margen, y enantes Caterva, nos sos entamos ficieron montaxes sobre la hestoria asturiana, y retratos de la sociedá de la dómina; Nel Amaro, el mesmu Dolfo Camilo con Güestia…

A los demás nun sé, pero la nuesa esperiencia, que siempres atopó pilancos nuna alministración, casi siempres socialista, que nunca sofitó l’espoxigue nin el trabayu cultural identitariu por consideralu un pelligru pal sistema –a esto llega’l complexu d’inferioridá– nunca tuvo pa nos la suficiente reconocencia a nun ser d’un públicu mui específicu; yéremos una especie de frikis asturianiegos, la xente riíase de nós, nun te teníen en cuenta…

Nun queremos metenos con naide, sólo naguamos por tar nel sitiu que nos correspuende. Y como a testerones nun mos gana naide, llevamos munchu tiempu nesta xera, y abúltamos qu’hai un garrapiellu de xente nel seutor que piensa, agora que s’enteraron de qu’esiste, de qu’esti ye´l momentu de trabayar na estaya del teatru asturianu con raigón (nun sé porqué agora y non enantes, insisto) y qu’amenacien con constituíse n’élite abanderao del asturianismu nel teatru, vamos facer lo posible por espardir nes redes sociales el nuesu trabayu fechu dende fai más de quince años que pueda considerase Teatru Asturianu de Raigón. Igual paga la pena. Qu’ustedes lo disfruten.

 

Selmana de les lletres en lluna llena

Deja un comentario

Güei yá ye sábado 5, tenía ganes de que llegare; contaba quedar na cama tres díes de siguío, pero yá me llevanté sobre les once y fici nun se cuántes coses.

La verdá que toi contentu, yo y pémeque Inma tamién. L’actividá estos díes pa nós foi ablucante. Yá veníemos de facer el Criáu nel Filarmónica y lo de Bastián y Bastiana en L’Entregu; en cuatro díes adatación d’un clasicu asturianu a teatru contemporáneu; dos díes de presentación y amuesa de trabayos d’escolinos sobre la Ilustración, el resultáu d’un trabayu de dos meses de sesiones preparatories nos centros; una presentación d’un concursu y pa rematar dos bolos de Bastián y Bastiana.

Nun debe ser la primer vez que mos toca facer dalguna heroicidá asina en quince años, pero yo yá nun m’alcuerdo cuala foi la cabera vez. En too casu, magar qu’Inma y yo tiremos d’esti carru, ye munchu más cenciello y mui prestoso facelo cola ayuda de xente como, nesti casu, Izar, Rodri, Sandra, Vanessa, Pablo o Manuel, y con muncha otra que siempres t’anima a siguir.

La pena que tengo ye qu’esti esfuerciu de toos y toes tenga tan pocu espardimientu; nun ye proporcional nin lóxico. Sedría necesaria una continuidá na amuesa de los trabayos, una difusión afayaiza. Camiento, y dígolo sinceramente y con tola modestia, que nun son trabayos cenciellos de facer, que sinifiquen dalgo endientro la cultura, la llingua y el teatru asturianos; y que si lo qu’intentamos ye abrir puertes y desendolcar la nuesa cultura arriqueciéndola con nueves propuestes, pues ye dalgo frustrante que nun s’abran, que nun se sepa, que nun figure en dengún llau, que nun-y importe a naide. A les funciones, sacante la primera de Nava, vieno mui poca xente. Esperamos que más públicu pueda disfrutalo, magar que sé qu’eso nun va pasar a curtiu plazu.

Pues quería descansar, pero güei tuvimos ponemos con otru proyeutu pal San Xuan, y otros pa mercaos, que nun pudimos facer la selmana pasada; tengo d’iguar l’escritoriu de casa que paez que pasó la cicloxénesis, y tengo ganes de retomar lo de la tesis, lleer tranquilu ya escribir un pocu. Pero sobre too, deseyo, pa mín, pa Inma, pa los que trabayen con nós y pa los y les que puedan disfrutar del nuesu trabayu, que vengan esti añu, polo menos quince selmanes como ésta.

Y nun sé por qué razón estos acontecimientos coinciden casi siempres cola xubida de la lluna…

Hamlet y les eleiciones n’Asturies.

1 comentario

Hamlet (a Ofelia): Yá sentí falar de les vueses pintures: Dios dióvos una cara, y vos facéis otra.

De los preseos que s’empleguen davezu pal oficiu teatreru, tolo que ta venceyao a la estaya de maquillaxe y/o carauterización ye lo que me dá más perceguera. Nun lo soporto. Ye raro ahora actuar, pero cuando me tocaba actuar, yera mui raro que me maquillara. Los brillos de la cara, los colores, los güeyos, los focos, dábame igual; si podía, m’escaqueaba. Cosa que nun puedo facer agora que los comediantes son otros. Prestaríame escaqueame de les elleiciones. Dánme perceguera, por munches coses, pero entre elles pol abusu de maquillax de los candidatos y candidata qu’ocupen espaciu na prensa y medios de comunicación, y qu’amás “sal-yos a coste cero”. En fin.

Mercedes Fernández “Cherines” ye vieya conocía. Quiero dicir que fai tiempu que la conocemos. La verdá que, salvando les distancies polítiques y afectives, ye una muyer que, sinceramente, paezme atractiva –algún defeutu tenía yo que tener–; dende llueu ye la que me paez más atractiva de los candidatos con espaciu na prensa. Amás paez que colos años va ganando na imaxe de seriedá y la capacidá de xenerar confianza nel so ellectoráu, pesie a  la capa d’enllucimientu de tres centímetros qu’algama remocicala unos añucos –insisto que paezme que ta estupenda. Vivimos nesa época de la eterna xuventú y primaverización de la sociedá, na que va incluyío’l querer facenos creyer que ye meỳor, pesie a que son eleiciones autonómiques, que nos gobiernen dende Madrí como al restu d’españoles, o que nel teatru toes tenemos que ser Arturo Fernández y tener munchu ésitu. Incluso amenaza con volver a vivir n’Asturies.

Javier Fernández ye lo más. Porque tres d’esa apariencia de galán de guestern de la Cuenca escuéndense non pocos años d’edá; detrás de los centímetros de maquillaxe escuéndense fondes feríes de munches batalles internes; dulcifica una cara mui dura, necesaria pa presentase como alternativa segura depués de qu’el so partíu fuera l’encargáu xunta otros d’esfelpeyar dafechu’l nuesu país, y que tamién escuenden l’ascu que tien por cualaquier cosa qu guela a asturiano. El so sitiu nun tá equí, ye evidente, pero disimúlalo.

De Jesús iglesias, magar que me caiga bien personalmente, tengo dicir que tien un maquillaxe discretu; yá hai protagonistes dende la supuesta manzorga que dan l’alternativa, y él ye como’l secundariu. Como’l secundariu de tola vida. Y sigui nes sos trece, yá mos amuesó les sos intenciones de pactu. Y que ye más importante falar de la crisis y del trabayu que de la cultura asturiana, como si fueren coses incompatibles. En fin, previsible.

Ye abondo sinificativo qu’esta fin de selmana vinieren los tres líderes de PPSOE+IU xuntos dende Madrí nel mesmu avión. ¿A contanos qué? ¿A falanos d’un asuntu tan importante, que nun digo que nun lo sea, como’l copago? ¿Asturies nun tien problemes que solucionar aparte d’esi d’ambetu estatal? ¿O ye que quiciabes ellos si quieran solucionar problemes a nivel estatal colos votos de los asturianos, por exemplu la representatividá ya imaxe de los partíos estatales? Ellos vienen equí de fin de selmana a fartucase, y a dicir chorraes nes fiestes de los sos collacios-es, pero nós tábemos equí yá…

Bono, Cascos creo que tamién taba. Creo. Anque n’eso Cascos nun entra. La mázcara de lo asturiano asítialu n’otru llau. Yo creo que Cascos amás de maquillaxe y gomina pa la entrevista con Ana Pastor, debe llevar botox, pa intentar xustificar lo inxustificable, pa disimular el desgobiernu y la falta capacidá. Y traxe de paisanu normal p’andar per Asturies, magar que lo del país asturianu siéntese cada vegada menos.

Y pa finar colos partíos estatales, falar de Nacho Prendes, que nun-y fai falta maquillaxe, anque lu lleve, p’amuesar qué alternativa propón el so partíu. Ynestrillas amuesó’l so enfotu nesta alternativa y por si fuera poco propón acabar col sistema autonómicu, diz que l’asturianu ye un pilancu pal progresu y no cultural propón qu’el Niemeyer valga pa la entrega los Premios Príncipe. Si nun hai espaciu nel escenariu, home… Y nel escenariu políticu autonómicu tampocu debiera haber espaciu pa una alternativa tan ultra, oportunista, cuestionable y ayena totalmente a nós.

  • Hamlet: Sois honesta?
  • Ofelia: ¡Señor!
  • Hamlet: ¿Sois bella?
  • Ofelia: ¿Qué quier dicir vuesa alteza?
  • Hamlet: Que si sois honesta y bella, la vuesa honestidá nun debiere almitir tratu cola vuesa belleza.
  • Ofelia: Señor, ¿podría la belleza almitir meyor tratu que cola honestidá?
  • Hamlet: Sí, daveres; porque la fuerza de la belleza camudará a la honestidá nuna furcia enantes que la fuerza de la honestidá seya quién a camudar a la honradez a la so semeyanza. Enantia, esto foi una paradoxa, pero agora’l tiempu amuésalo.

Una belleza, de botox y d’afeites, que nun ye honesta, porque anque quier convencenos de que quieren solucionar los nuesos problemes, nun aporten nin una solución. Una máscara que quier dar apariencia de mocedá a les mesmes alternatives polítiques de tola vida, son los mesmos de siempres, y nun van facer nada como siempres. Y por eso me dan perceguera, porque hasta pa eso tamos condicionaos, tamién cola inestimable ayuda de los medios de comunicación, por supuestu. Estes eleiciones –y mira que nun me presta nada empegar llinguaxe teatral pa falar d’otra cosa que nun seya’l mio oficiu– son una farsa grotesca. Nun hai futuru dengún con esta xente, con estos mazcaritos.

  • Hamlet: (a los cómicos): …nun rebases la moderación de la Naturaleza, pues cualaquier cosa qu’asína se desaxere, apártase del pruyimientu del teatru, cuya fin, nel entamu y agora, yera y ye, por dicilo asína, caltener l’espeyu a la Naturaleza, amuesando a la Virtú la so propia fegura, al Viciu la so propia imaxe, y a la dómina y conxuntu del tiempu la so forma y güelga.

Y ye asina, a mí gústame’l mió país. y quiero trabayar nel mio país y pal mió país. Y colo que me encuentro ye con tolo contrario, nun puedo facer nada d’esto. El mio país dame a veces ascu; apetez colar pa onde seya. Sé-sabemos perfechamente de quien foi la culpa de tar asina, nun pasáu reciente y remotu, y tan obligándonos a siguir aguantándolos, nun quieren dexanos alternativa. Parte del proyeutu del estáu p’Asturies ye camudar el paraísu natural por un vertederu estatal. Enllenar les ales despoblaes d’ocalitos nittens. siguir faciedo chiringuitos, d’un llau o d’otru. Ensin falta d’eleiciones yá tienen repartíu’l pastel, yá se sabe quién va pactar con quién pa qu’Asturies nun dea problemes nel Estáu, y puedan siguir chupando, fundiendo esta comunidá, y siguir anulando la nuesa identidá. Pallabres, pallabres, pallabres… Ye patético.

La cosa ta na nuesa manu. Pémeque ye necesario que veamos la necesidá de camudar el sintíu del votu, de construir una alternativa nuesa, seria, discreta, honesta y bella. Y hai alternativa, anque nun la queramos ver, anque mos dea mieu lo supuestamente desconocío, anque los medios de comunicación nun la publiquen, anque nun lleve maquillaxe. Yá toquemos fondu, y yá somos mayorinos.

  • Hamlet: Ser o nun ser: esa ye la custión; si ye más noble sofrir nel ánimu los tiros y flechazos de la insultante Fortuna, o alzase n’armes escontra una mar d’axitaciones, y dándo-yos cara, acabales.

Yo voi votar distinto. Yo voi votar BA-UNA-LV. Ye lo único que me presta.

Elleiciones

Deja un comentario

Yo nun atopo denguna elleición meyor que votar a BA-UNA-LV. Pensando dende’l mundu de la Cultura, que ye lo que me toca, nun voi votar al psoe enxamás, porque son los que nos fundieron, faciéndonos vieyos a base de disprecios; al PP tampoco, fai tiempu defendíen la “cultura del ésitu”, eso ye perpeligroso y nun me paez que vayan camudar d’opinión. IU van tar arimaos a onde-yos convenga, y nun tan mui en condiciones de defender na de cultura asturiana, hai coses más importantes, díxolo J. Iglesias. El FORO, la nuesa lóxica oposición, nun paez que tenga les coses mui clares nin capacidá pa iguar esti desastre cultural; de UPyD lo meyor que puedo dicier ye que nun teníen porqué presentase n’Asturies si nun son favoratibles al estáu de les autonomíes, ye un poco contradictorio, y amás arrenieguen de lo público na cultura.
Falar de cultura, de política cultural, caberamente fala cuaquiera, ta como de moda, pero ye una cosa mui complicada y necesítase aislalo de la política y los políticos. ye necesario pala industria cultural en xeneral y pal seutor de les artes escéniques en particular, un PLAN ESTRATÉXICU que permita que los recursos invertíos en formación puedan amortizase equí pola xente d’equí y pala xente d’equí. Y pa eso hai qu’esborrar munchos clichés y frases feches y ponese a trabayar toes y toos. Nun conozo a naide que pueda facelo meyor, más seria, honrada y cabalmente. 

Newer Entries