Corto-circuitu de teatru

La cabera y llamentable novedá que tuvo llugar endientro’l pequeñu universu del teatru asturianu protagonizóla la conceyala cultura del Aytu. de L.lena, d’IU pa más señes, qu’arrenuncia a que’l so conceyu figure ente los que se beneficien de la ufierta del Circuitu Asturianu de Teatru Profesional, un plan que punxo en marcha la Conseyería Cultura del Principáu pa los ayuntamientos asturianos, y que permite llevar teatru profesional costeando namás qu’un 50% del preciu de les actuaciones, al poner la conseyería la otra metá. La inesplicable, inesperada ya incoherente decisión foi retrucada enforma pola Asociación Foroescena, qu’agrupa a la mayoría de compañíes profesionales del sector (de la minoritaria ACPTA nun se supo nada), y polos partidos de la oposición l.lenense. El representante del PSOE llegó inclusive a presentar una moción pa que l’ayuntamientu volviera a formar parte del circuitu, col resultáu que s’amosa nel artículu qu’equí s’apurre:

http://lavozdelena.es/cultura/el-voto-de-calidad-de-la-alcaldesa-refrenda-la-salida-de-lena-del-circuito-de-artes-escenicas-225

L’actitú de la conceyala d’IU y la de los sos compañeros y compañeres de partíu abulta impresentable, ye un desbarre, amosa un desconocimientu total de lo que supón la función social de la cultura, ye un despreciu al llabor de les compañíes profesionales, una falta de consideración cola so población y los sos drechos como ciudadanos, y dexa entrever escuros intereses, por casu, suplir la opción profesional pola amateur, más barata incluso. Volveré sobre ello.

No obstante, quixera apurrir una opinión particular sobre l’actitú del PSOE nesti asuntu, que tamién me choca abondo. Preocúpame la rentabilidá política que dalgunos que nunca dieron un duru por nosotros pretenden sacar a costa de nueso. Pa que la so propuesta en L.lena resultare creyible, habría que pedi-y al partíu que nos ámbitos autonómicu y llocal fuera coherente colo qu’agora con tanto enfotu defende. Sobrescobiu, onde gobierna’l PSOE, formó parte del circuitu y agora nun tá. Ye verdá que tien un espaciu pequeñu, pero…  Llaviana,  onde gobierna’l PSOE, nunca tuvo nel circuitu,  pero podía, tien un espaciu afayadizu. Ayer, onde gobierna’l PSOE, va años dexó’l circuitu apostando pol teatru aficionáu, que yera más baratu. Pravia, onde gobierna’l PSOE, tamién abandonó’l circuitu. A Veiga d’Eo, onde gobierna’l psoe, lo mesmo. Amás, el circuitu nun lu inventó’l PSOE, nin muncho menos IU; púnxolo’l PP. Quiciabes el conceyal socialista de L.lena podría recordá-ylo a los suyos,  anque nun creo que lo faga, debasa les sos competencies. Quiciabes debiera la profesión tirar d’hemeroteca y nun sólo d’hemeroteca, y recordá-ylo a toos ellos, y recordá-y al PSOE, coles mesmes, que nun se fizo nada en trenta años dende l’ambitu autonómicu pol teatru profesional asturianu más que retayar constantemente la cuantía de les ayudes. Hasta tal puntu que tamos agora igual qu’en 1995, y nesi añu yá yéremos lo cabero del estáu. Cierto qu’hai agora ciertu enfotu por parte de la conseyería en promocionar el circuitu, y que les rellaciones al menos d’una gran parte de la profesión cola alministración autonómica son bones. La mio opinión particular ye que son parches, pa cambiar esto fai falta muncho más. Espero enquivocame.

Escaecíaseme añadir a la esbilla d’enantes los conceyos de Parres y Piloña,  que dambos son del PSOE y tuvieron nel circuitu nel so momentu. Hai otru ayuntamientu del PSOE, que ye Llanes, que nun merecería tar nel circuitu, por que nun tien instalaciones afayadices, casu contrariu al de L.lena, por ciertu, que tien un fermosu teatru restauráu con fondos públicos. Y otros dos, que son Carreño y Corvera que, magar que tean nel circuitu, apuesten claramente pol teatru aficionáu, aldu que se barrunta que garre L.lena, y que Llangréu yá garró va tiempu, por munchos motivos mui llargos d’esplicar. Otros conceyos interesantes podríen ser Cuideiru y Ribesella,  que nunca tuvieron y podríen; ún del PP y otru de Foro. De Foro tamién Noreña. Y Xixón, d’onde habría muncho que falar. Y escaécenseme dellos más, de xuru. Pero, en suma, el casu ye que nun importamos nada a naide.

Lo d’IU yá entama a ser preocupante. De nada valió la reunión que caltuvo una diputada autonómica del partíu cola conceyala de L.lena a esti respeutu. Tampoco paez que deprendieren nada de cuando se presentó nel parlamentu español una propuesta nel congresu pa equiparar el teatru aficionáu al profesional, que d’aprobase, supondría la desapaición del teatru profesional a nivel estatal. L’erru foi reconocíu pol mesmu Gaspar Llamazares. Y n’Uviéu paez ser que tampoco se dan por enteraos, yá que paez qu’apuesten claramente pol teatru aficionáu (según dixo’l conceyal Rivi nel so día), o por recuperar tradiciones musicales qu’agora tan lloñe de ser populares, produciendo zarzueles de nueva creación, dando exemplu de bon facer al mesmu INAEM del Ministeriu Cultura. Quiciabes l’uvieín seya’l modelu cultural al que se refieren l’alcaldesa y la conceyala de L.lena cuando falen de que quieren facer una «programación teatral de calidá».

Nun digo que esfuercios como’l que ficieron los partíos de la oposición y l’Asociación Foroescena pa intentar esbrexar dalgo de camín en L.lena sean infructuosos, tolo contrario. Pero pamidea qu’entá queda muncho que facer p’algamar la normalidá del teatru profesional n’Asturies, llevamos perdíos munchos años, y nun solo somos nosotros y nosotres los que se tienen d’esforzar. Tamién ye verdá que parte de la culpa de too esto tenémosla les mesmes compañíes, onde siempres hubo una minoría influyente que s’apuntó al «Virxencina, que me quede como toi». Y asina nos va. Pero esi ye tema pa otru post.

Anuncio publicitario

Web personal y blogue: www.antoncaamaño.net

Prestábame tener na mesma web el blogue y la mio hestoria profesional, y paezme que yá ta too más o menos; queden por completar delles coses, y la parte de les semeyes tá n’obres, porque como ye propio de los actores de pro, nun tengo nin una mala semeya qu’encartie. Pero bono, yá ye custión de tiempu. Que vos preste.

Civilization VI, con «La habitación con una cama»

Apúrrovos una entrada al blogue del estudiu  «La habitacion con una cama», onde se fala del procesu de trabayu del vidiuxuegu «Civilization VI», nel tuve’l gustu de participar faciendo’l personax de Felipe II:

http://lahabitacionconunacama.com/estudio-doblaje-videojuego-civilization-asturias-2/

Reiventándomos

Toi intentando remodelar el blogue pa que me pueda valir de páxina web personal. Entá nun ta del too activo; a ver si pali que pali va la cosa afitándose. En teoría yá pue accedese dende la dir http://www.antoncaamaño.net. Con «ñ».

Tesis. Agradecimientos. Precisiones.

Quiero dar les más fonderes gracies a tola xente que me fizo llegar les sos felicitaciones, a los medios de comunicación y a los profesionales tanto de Galicia como d’Asturies qu’espublizaron la noticia de la presentación de la mio tesis, y tamién a toles persones que contribuyeron a espardila peles redes. Toi percontentu cola repercusión que tuvo l’asoleyamientu del trabayu y tamień cola acoyida que se-y brindó. Prestaríame, d’otra manera, que nun se quedare neso, y que realmente contribuyera a que’l teatru profesional y a que’l teatru asturianu algamaren la sonadía, el respetu y el sitiu que-yos correspuende tanto no social, como no académico o no artístico. Pero eso yá nun depende solo de mí…

D’otramiente, prestaríame precisar dellos aspeutos que quiciabes nun quedaron abondo claros por cuenta del so tratamientu nos medios; anque pienso que sí que ta desplicao suficientemente, pruyíame esclarialo pa que nun haya malos entendíos. La razón pa que la tesis se presentare na Universidade de Vigo foi única y esclusivamente‘l rangu académicu de toles Escueles d’Arte Dramáticu del territoriu del estáu. Son escueles onde se realicen estudios superiores, como foi’l grau de Direición d’Escena nel mio casu, pero que non dependen de la Universidá como otres facultaes. Ye una situación problemática qu’habría d’iguar darréu, ensin dubia, p’algamar la total equiparación. L’alcuerdu robláu na Universidade de Vigo por Arte Dramático y la Facultá de Filoloxía e Tradución permite ufrir másteres y doctoraos n’Artes Escéniques, como asocede tamién n’otros llugares. Y esa foi la razón fundamental de que matriculare ellí pa ellaborar la tesis, y de que n’Asturies nun pudiera ser (yá qu’equí nun hai alcuerdos d’esi tipu, magar que me consta que ta trabayándose nesi sen).

Per otra parte, el trabayu efeutivamente presentóse y defendióse n’asturianu; pero en dengún casu se punxo torga denguna dende dengún estamentu de la Universidá asturiana a qu’asina se fixera, y polo tanto nun ye esi’l motivu de que s’asoleyare en Vigo. Sí ye verdá, y eso ye sabío por tol mundu, que n’Asturies tiénense presentao tesis n’asturianu y tamién, llamentablemente, qu’hubo dellos casos que nun se permitió presentales por tar redactaes en llingua asturiana. Ye dalgo que ye necesario normalizar, evidentemente, tanto nel entornu académicu como nel social. Pero la razón pola que’l mio trabayu se presenta n’asturianu ye cenciellamente por coherencia cola temática y cola mio trayeutoria y forma habitual d’espresame; en Vigo alcontréme con un talante mui favoratible, eso tamién ye verdá.

Más nada. Voi apurrir equí dellos enllaces a notes que salieron en prensa de les que tengo yo noticia:

• Besadío, Digna. «Unha tese propón a creación en Asturias dun centro dramático similar ao galego». Diario da Universidade de Vigo [01-02-2016]. http://duvi.uvigo.es/index.php?option=com_content&task=view&id=10882&Itemid=3
• «Un estudio propone crear en Asturias un centro dramático como el gallego». Faro de Vigo, [02-02-2016]. http://www.farodevigo.es/gran-vigo/2016/02/02/estudio-propone-crear-asturias-centro/1396569.html.
• Rubiera, Pilar. «El actor Caamaño defiende en Vigo su tesis en asturiano al no poder leerla en Oviedo». La Nueva España [02-02-2016]. http://www.lne.es/servicios/multimedia/imagenes.jsp?pRef=2016020200_124_1877062__Sociedad-actor-defiende-Vigo-tesis-asturiano-poder-leerla-Oviedo. (SOLO PA SUSCRIPTORES)
• A.F. «El teatro asturiano ya tiene tesis doctoral». El Comercio [02-02-2016]. http://www.elcomercio.es/culturas/201602/02/teatro-asturiano-tiene-tesis-20160202003148-v.html
• «La tesis de Caamaño da por muerto el teatro profesional asturiano, que mantiene 40 compañías y 200 actores». Europa Press, [02-02-2016]. http://www.europapress.es/asturias/noticia-tesis-caamano-da-muerto-teatro-profesional-asturiano-mantiene-40-companias-200-actores-20160202205443.html
• «Defiende en Vigo su tesis doctoral en bable al no permitírselo en Asturias». Radio Vigo, Cadena Ser. [02-02-2016]. http://cadenaser.com/emisora/2016/02/02/radio_vigo/1454424288_631183.html.
• «Doctorado en Artes Escénicas con denominación de origen asturiana». Asturias24. [03-02-2016]. http://www.asturias24.es/secciones/cultura/noticias/doctorado-en-artes-escenicas-con-denominacion-de-origen-asturiana/1454416274

Con Manuel Ángel Candelas Colodrón, codireutor de la Tesis

A ver si d’equí a poco podemos falar del trabayu y los sos plantegamientos. Intentaré faer una presentación pública, quiciabes na ESAD, en Xixón. Informaré.

Gracies de nuevo.

 

 

 

 

 

 

Caleyos d’aguilandu. Grau-Posada Llanera

Esti calorón que mos afuega estos díes tien efeutos cuando bonos cuando malos; los malos yá la conocemos toes y toos, asina que vamos reparar nún de los bonos. Güei, na redolada de San Xuan de Villapañada, un pueblín que ta a les afueres de Grau, salía la mazcarada de los Aguilandeiros. L’etnodrama recuperólu apocayá Xose Ambás, en comuña col estudiosu Álvaro Valdés y la collaboración de los grupos Xeitu y Territoriu Bron. (Pue consultase l’artículu espublizáu en LNE de 27-12-2015).

El día nun yera iverniegu pa nada, pero animaba a facer una visituca per esos llares. El pueblu de San Xuan ta a la vera la carretera xeneral que sal de Grau en direición a Curniana. Otros pueblinos au se pudo disfrutar de la mazcarada foron Rozadas, Acevéu o La L.linar. Ye bien guapa tola zona y encartió la folixa; atopámonos ellí vieyos conocíos y conocíes, que siempres presta.

En finando la visituca nun mos echamos pelos caleyos  anque apeteciere, sinón que baxamos a Grau a xintar daqué, yá yera hora. Magar que pienso qu’esta contorna nun ye lo que se diz sidrera por definición (si bien pa la cercana parte de Belmonte había producción, d’ehí topónimos como Pumarada), topamos con una sidrería perbien armada, denomada Feudo Real. Allá tomamos sidre Trabanco, normaluca, bien, como siempres, y xintamos una ufierta de tapes por venti euros los tres que díbemos que quedamos como los reis del Feudo.

Arrancamos llueu y cruciamos el guapu pueblu de Peñaflor, asitiáu nun estelante llugar, cola so ilesia románica, y pasamos la ponte pa empobinar al conceyu de Les Regueres. Ye un conceyu pequeñu y non mui conocíu, pero que paga la pena visitar despacín porque tien munches coses que ver. Ye l’encruz del Camín de Santiago pel interior col Camín de la Mesa, y asítiase a la vera’l Ríu Nalón. Les arriondes del riu son espectaculares. Al pocu de cruciar la ponte, un llugar onde tuvo llugar una pernomada batalla cuando «la francesada», y qu’agora se recontrúi per aciu’l llabor de l’Asociación de Recreación Histórico Cultural de Asturias , topamos un desvíu qu’indica pa Valduno, a la mandrecha. Pasamos per delantre del ablucante Palaciu de Bolgues y siguimos tresviesando una llanera que mos avera a la polación de Valduno. Visitamos les termes que se descubrieren embaxo la ilesia de Sta. Olaya, agora anovada depués de que valtiara l’antigua románica.

Entramos en Casa Dylsia, un chigre-tienda con un comedorucu bien afayadizu y que tien pinta de comese bien, casero y non mui caro. Siguimos camín, haza l’Altu l’Escampleru, y torcimos camín d’Avilés. Per esa carreterina, que güei taba especialmente guapa pola lluz de la tardi y lo verde, a poca distancia, a mandrecha, vamos topar un desvíu que nos empobina a Posada, per San Cloyo, Tuernes Grande y Pequeñu, bien prestosa; garrábase va un tiempu p’atayar si teníes que facer la ruta Xixón-Grau, cuando nun había autopista. De toes maneres, nun vamos garrar esi desvíu y vamos siguir en direición a Avilés viendo paisaxes perguapos, hasta llegar al pueblu d’Arllós, entá del conceyu de Llanera.

Nuna llomba que ta llantada metanes del valle, álzase la ilesia románica de Santiago d’Arllós, que caltién una portada principal perinteresante, anque dalgo esfaraguyada; tamién dalgún caneciellu, na testera.

Ye ésti un sitiu guapu, atrayente; yo barrunto, ensin denguna preba científica, qu’esa ilesia ta construyía coles piedres d’un castru que posiblemente s’allugare ellí enantes. El sitiu da pa maxinalo.

Siguimos pela carretera hasta Posada Llanera, concasando ellí con un par de rutes enantes amosaes. Un prestosu paséu.

 

Asturies amburiando. As novas «Fogueiras do natal»

L’amigu Berto Peña cuntábame que fai non munchu tiempu, en dellos pueblos asturianos, lo mesmo que nel norte de Portugal o dalgunos llugares de Galiza, Zamora o Lleón, cellebrábase per estes feches la fiesta denomada «As fogueiras do natal». Ye’l contrapuntu a San Xuan, que como ye sabío, vien recordanos que ye la nueche más curtia del añu, mientres que nestes feches d’avientu ye cuando los díes entamen a facese más llargos.

Llarga nueche la de güei, nun sólo porque los ritmos de la naturaleza, que l’home nun puede domeñar, establécenlo asina. Mañana son les elleiciones xenerales. La xente ta esperanzao y nervioso. Y dalgunos tan nerviosos que pretenden controlar la naturaleza a base de prender fogates y  amburiar bosques. ¿Cuála ye la razón?

Güei echamos la cabera función de la ópera «Il Duca d’Alba». Nel últimu descansu, enantes de salir, lleo nel fb que tan declaraos polo menos 30 fueos n’Asturies, que más tarde sedríen más d’un cientu. Salí del curro pasaes les once la nueche. Sentí la necesidá de facer daqué, quería saber qué pasaba, qué necesidaes había. Les compañeres yá dispusieren una rede de sofitu pa la xente evacuada… Otres acudíen a los incendios… Al paecer los fueos taben concentraos nes fasteres occidental y oriental d’Asturies, Viavélez evacuáronlo, nun sé… Munches noticies. Por cierto, tamién amburiaba La Col.ladiel.la, caleyu que amosáremos nel capítulu anterior. En Xixón había incendiu y fui p’allá de secute.

Ruedes ye una prestosa parroquia de Xixón a la que se pue llegar pela Carretera Carbonera, pasando Mareo y la Pedrera. Hai un desvíu a la mandrecha y xúbese una cuesta bien pindia. Nel altu ta la parroquia, espardía per dellos barrios; al pocu de llegar arriba tópeste cola guapa ilesia d’aniciu románicu y l’edificiu de la escuela. Intentara llegar per otru caleyu, ún que xube dende La Pedrera, pue enganchase dende’l chigre Casa Oliva, pero atopéme col fueu, di la vuelta y tiré pola primer ruta. Dende lo alto, que tien el Picu Samartín y Güerces al otru llau del valle, hai unes vistes estelantes de la ciudá de Xixón y de tola rodalada.

Subió Nuria, la nuesa conceyala de XSP, y tuvimos falando colos bomberos y municipales que taben allá nel operativu. Ensin mayores consecuencies, por suerte. Ellos aseguráronmos que l’incendiu yera provocáu. A la de dir a la gueta les causes nun sólo d’esi, sinón de los más de cien incendios declaraos en toa Asturies, nun-y dieron muncha vuelta al son. Dicíen que por descuido de los paisanos que van quemar herba seco, matos y bardiales, y píllalos l’airón esti y prende tou.

Casualmente, el sitiu onde ardía ye un cotaraxu con unes vistes impresionantes. Paez, poles informaciones que van llegando, –non pela TPA, que yá dixo que nun tenía medios pa cubrir ná, nun sé pa qué tan ehí– qu’hai munchos incendios pela costa, tamien en Muniel.los, en Llanes, Cabrales…

Itinerariu propuestu: esto ye TERRORISMU MEDIUABIENTAL. Yá se comprobará, pero la mayoría de zones amburiaes son d’interés pa constructores. Hai una llei de montes que permite construir en zones quemaes. Mañana hai elleiciones. Pudiera dase’l casu, oxalá, que salieren escoyíes fuerces polítiques que podríen torgar esa llei. Dalgunos pensaron que valía más curase en salú, y polo tanto, tan quemando’l nuesu país.

El festexu d’As fogueiras do natal tenía una finalidá: apurrir calor y lluz nos díes más escuros del añu. D’ehí fiestes como Sta. Llucía, ente otres. Pero güei Asturies, magar que coincida la fecha, nun ye una fiesta por munches fogueres qu’haya. Ye una catástrofe. De toes maneres, espero que mañana nos vuelva la sorrisa. Que se torgue esa llei. Qu’haya dotaciones con medios afayadizos pa resolver estos tristes episodios. Asturies ye un país persensible a esti tipu de siniestros. Y coles mesmes, que s’investigue que foi lo que verdaderamente ocurrió y cómo ta organizao too esti atentáu; que nun tenga consecuencies pa naide inocente; y qu’a cortu plazu podamos volver a ver los caleyos d’Asturies, como estos tan fermosos de Ruedes y la so rodalada, verdes, como siempres.

 

Caleyu a los años setenta. Sotrondiu – Figaréu (Mieres)

El caleyu que vos propongo ye de primer división. Teníalu fechu, pero’l día que foi taba emborrinao, orbayaba y nun se vía gota. Apetecíame volver a pasar, tábemos en Sotrondiu de visita y como fago davezu, empobinamos pa Mieres pel camín más llargu. Pagó la pena.

En pasando la ponte so El Ríu Nalón camín d’Uviéu, xusto ehí a la manzorga sal una carreterina qu’indica Urbiés. D’esmenu somórguieste nun vallucu perestrenchu que va pasando per dellos pueblos, ente ellos Santa Bárbola o La Potoxa. Al empar hai una ruta andariega o pa bicicletes que llega al Altu La Col.ladiel.la, que debe ser abondo interesante y prestosu pa dir con calma y disfrutar del bayurosu patrimoniu natural ya industrial que caltién. En tou casu, la carreterina AS-337 métese per esti Valle de Sta. Bárbola, paisax protexíu, y a cada curva qu’hai, que nun son poques, asáltanos una vista ca vegada más espectacular, hasta algamar los 900 metros sol nivel de la mar que marca un cartelu nel Altu.

Valle de Sta. Bárbola, dende l’Altu La Col.ladiel.la

Pela zona hai munches rutes, como la que facíemos mención enantes, qu’aprovechen víes de ferrocarril que salíen de les mines, y carreteruques. Les edificaciones, aparte d’horros, paneres, molinos y llavaderos, que tamién los hai, identifíquense coles cases típiques de trabayadores de la zona, iguaes pa soportar l’agua y el fríu, pero ensin mayor interés arquiteutónicu.

Valle de Turón, dende La Col.ladiel.la

Siguimos, y nel encruz d’esta xubida cola que vien de Ciañu, y enantes de baxar camín d’Urbiés, topamos col chigre Casa Migio. Nun yera la hora xintar, asina que tomamos un cafetucu y aprovechamos pa echar una güeyada. Ellos ufren callos caseros y corderu a la estaca como platos principales. Tien mui bona pinta’l chigre, con comedor, sidra y de xuru que quesu d’Urbiés.

N’acabando arrancamos camín de Mieres, pasando per esti pueblu d’Urbiés que sosprende polo grande que ye pa tar encoláu onde tá; ensin dubia, la mina marcó’l desendolque d’esta villa, como’l de tol valle, asitiada mui cerque de delles mines a cielu abiertu, pa la zona de Polio –de la que baxes a la drecha del valle– y de los míticos pozos turoneses, munchos d’ellos pesllaos y que puen vese a la vera la carretera. Una de les razones poles que faigo estes escapaes ye porque me dexen desconeutar y viaxar un poco nel tiempu. Pero ye evidente qu’eso va pasá-y a cualesquier persona que pase per esta zona del valle Turón a poco que repare en daqué cosa. La vuelta al blancu y negru, a los años 70, ye impepinable, afatada amás colos cartelos del PSOE y de IU pa les eleiciones xenerales del 2015.

En Figaréu remata la AS-337. Les ilesies nes Cuenques Mineres nun constitúin el patrimoniu más destacáu, poques gracies. Sicasí, dalgo quedó interesante; pa fincar esta ruta, coles mesmes, podríemos proponer una visita a la ilesia de Samartín de Tours, d’aniciu prerrománicu, a poca distancia de Sotrondiu, y rematala n’Uxo (Mieres), na ilesia de Santolaya, monumentu nacional con importantes capiteles y canecinos románicos. Nós escoyimos pa charrar de la visita comercial que tocaba en Mieres otru templu que ye la Sidrería La Solana, con menú del día afayadiegu, bon tratu y dellos palos de bona sidra, ente ellos Canal o Fonciello.

Tolos caleyos lleven a Roma. Llanera – Xixón.

Pruyíame va tiempu atopar el llugar concretu aonde s’asitiaba Lucus Asturum. L’amigu José Paz indicómelo correutísimamente. Díxome, amás, qu’al paecer los trabayos d’escavación y estudiu arqueolóxicu de les güelgues romanes taben remanando otra vegada, y que’l tarrén onde s’allugaba ye abondo grande. Entá nun se repara en nada de los resultaos, pero yá se tien visto perehí a dellos furtivos antroxaos de guardies civiles qu’anden a la gueta d’ayalgues, ensin qu’atoparen, eso sí, más que dalguna moneda que cayere inocentemente de dalgún bolsillu nel prau de la fiesta.

Finques ente Llamorgal y Llugo de Llanera

Estos praos son parte de la esplanada que s’estiende ente l’Aeródromu de Llamorgal y la polación de Llugo de Llanera, que garra’l so nome del polamientu romanu. Paez ser que les büelgues atopaes y los estudios falen d’un xacimientu bien grande, y que s’asitia en toa esta fastera. Si salimos de Posada en direición a Uviéu, dempués de tomar una botella sidra o xintar por casu na Sidrería La Sierra –dígolo porque siempres cayemos perehí cuando vamos a actuar, y tien un menú afayadizu — garramos na rotonda que ta a la salida’l ramal que va a Llugo de Llanera. En pasando la entrada a l’aeródromu, hai a la drecha unes cases y darréu una pistuca que crucia toos estos praos, y que s’allega a Llugo de Llanera, a la parte de la ilesia.

Si siguimos per esta mesma carretera, vamos dar a la cruciada de la que va de Posada a Llugo y de la que sal un ramal qu’empobina a los pueblos de Robléu y Mundín. Son muy guapes les caseríes y los horros; pue vese lo mesmo si se garra otra carreteruca, tamién dende Llugo que pasa per un pueblu que tien el sospechosu nome d’El Castru. Tamos na parte más alta del conceyu de Llanera, y les vistes sobre tol valle central son estelantes. Pelo alto d’esta pequeña cordal atópense delles capielles cerca la carretera, posiblemente antiguos llares viales, lo que llama l’atención si pensamos que Lucus Asturum yera la cruciada de dos caminos: el que diba d’oriente a occidente, y el de norte a sur; magar que paez ser que’l camín de Santiago, heriede de les víes primixenies entra en Llanera per Pruvia y va paralelu a l’autopista AS-II, fuera d’esa ruta tamién s’atopen güelgues d’esos llugares de descansu y oración, o bien pertenecen a otru itinerariu –pueque de Serín a Villardebeyo, que víemos la vez pasada.

La cayida del cordal acaba al delláu de Tabladiello, peronde yá pasáremos l’otru día en direición a Serín; pero esta vegada torcemos a la mandrecha en direición a Arroyu, y pasamos perbaxo la «Y» pa llegar al barriu de Traveséu. La carretera pasa ente ocalitales y desagua notra que va del barriu d’Arroyu a Picún. Torcemos a mandrecha, dexando de llau unes estupendes vistes de San Andrés de los Estacones, y otru ramal más alantre que s’abre a manzorga déxanos llegar a Veranes y a la so Villa Romana, que paga la pena visitar. Les vistes dende lo alto Veranes son igualmente ablucantes, sobre tola cordalada, dende Picos al Aramo, y tamién sobre Xixón.

Xixón dende Veranes. La semeya nun fai xusticia.

En baxando de Veranes, podemos torcer y subir unos cien metros de cuesta pela antigua xeneral de Xixón a Uviéu pa entrar en Pinzales, y tomar una botellina o xintar un menú caseru y baratu en Casa Avelino; reculamos esos cien metros y garramos el ramal que va pa Tremañes, nun camín paralelu o cuasi que coincidente cola antigua vía que xunía Xixon y Lucus Asturum, y que sigui hasta Pruvia, como comentábemos.

Cuidaín con esa carreteruca. Tien tráficu pesáu asgaya y nun hai bona visibilidá, hai curves y condúzse mui apriesa. Igual que la Tresona a Serín que garráremos l’otru día. Tan pendientes les dos d’igua, pémeque, pero mentantu y non, curiaín.

Praos de Beloño, aonde hebio va pocu estudios. Hai llocalizaes delles güelgues.

Pasamos per Beloño, que tien restos tamién romanos (Les Muries) y per delantre l’Abadía Ceneru, con texu al delláu, prestosa portada románica y otros detalles; ente ellos, yá que la cosa va de Roma, teyes (tegules) y otres pieces, que nos fala del poblamientu romanu que tuvo que tener esta zona que s’asitiaba a la vera’l camín ente Xixón y Lucus Asturum; y tamién del prerromanu, al que-y daremos una vuelta notru momentu.

Portada de l’Abadía Ceneru. (Del mio archivu personal. Llocalizable en http://www.romanicuasturianu.net)

Podría acabase la ruta romana propuesta notres Muries, les de Tremañes, y na Fonte de la Victoria. En realidá, dambes güelgues tán mui cerque, pero agora asítiense a dambos llaos de la «Y»,  lo que fai que nos decatemos de cómo fraña l’espaciu una infraestructura d’esti tipu, magar que pasemos per ella tolos díes y nin lo pensemos. En fin; güei la dictadura del reló trabaya na nuesa contra. De toes maneres, y anque volvamos otru día per esta rodalada, pa la persona interesada son fáciles d’atopar.

Fonte romana de La Victoria. Del mio archivu personal. [Sacada’l 05-04-2015]

Turismu de cercaníes. Muros-San Esteban del Mar; Altu La Miranda – Xixón, per Serín.

Yá que s’hai que mover en coche por custiones qu’a veces nun presten gota, tales como dir a trabayar o a facer xestiones, reivindico que, a ser posible, se faiga dientro d’unes llendes afayadiegues, que permitan camudar el tiempu del negotium en tiempu de otium, polo menos en cierta midía.

Güei había quilómetros que facer, y delles paraes. De toes maneres la priesa nun yera daqué determinante, y fui quien a saltame la dictadura de l’autovía ensin perder efeutividá llaboral.

Tengo tao mui poques vegaes en Muros de Nalón. Una vez pa canciar na ilesia, y nun m’alcuerdo si dalguna más; n’aquella ocasión  aprovechamos pa dar una vuelta caleyando por un senderu que vien indicáu como ruta costera, perguapu. El pueblu caltién tovía la gracia tradicional de los pueblos que la caltienen; nun hai munchos edificios que contrasten o contaminen la visión, hai munchu posu mariñán ya indianu, y paez, nuna güeyada rápida, afayadiegu y que ta bien curiáu; nun podemos escaecer que tamos nel coral d’una zona turística de primer orde.

La vueltina que vos propongo sal dende l’Ayuntamientu y allégase al pueblu vecín de San Esteban del Mar. La carreteruca ye estrencha, pero prestosa; como a la metá del camín hai una zona recreativa y una capiella ensin demasiada gracia denomada del Espíritu Santu, llantada nun altu ente Muros y San Esteban. Les vistes son estelantes, si bien pa mirar pa San Xuan de l’Arena ye obligatorio dir a la gueta de dalgún güecu ente los ocalitonos que tan llantaos a la mandrecha de la capiella.

Pal otru llau, y más nun día como’l de güei, pue vese tol litoral hasta Cabu Vidio; ablucante.

El pueblu de San Esteban del Mar ye ún de los que más me presta d’Asturies; nun sólo por que tá asitiáu nesa zona privilexada que ye l’estuariu d’El Ríu Nalón, sinón tamién que porque caltién esi aquelli anacrónicu, coles güelgues de les instalaciones portuaries, les galeríes, y esa atmósfera que contrasta col entornu espectacular, y que de la mesma lu integra. Respírase una rara tranquilidá portuaria, hai una lluz especial, con arrecendor entrañable y prestoso. Igual tenemos d’agradecer que nun salieren alantre los planes de Xovellanos pal puertu San Esteban, nin tampoco’l proyeutu turísticu del ex-presidente Rodríguez-Vigil. Un sitiu pa escribir les memories mirando a la mar dende un ventanu d’aquellos, vamos.

Una vez que fice los mios deberes, torné a la autovia y volví a salir d’ella p’allegame otra vegada a Posada de Llanera. Pa facelo entá más complicao, y llibre yá de presiones temporales, decidí xubir l’Altu La Miranda y tirar pa Villar de Beyo. Menuda movida, pensaba yo, tenía de ser llegar va unos años dende Avilés a Lleón, por exemplu. L’Atu la Miranda, El Padrún, Payares… Nun va tantu tiempu, y da la impresión de que’l tiempu quedó clisáu neses carreteres… Pues vamos recular entá más nel tiempu. Primer parada na ilesia de Villardebeyo, un pequeñu exemplu de prerrománicu escaecíu. La ilesia, qu’a la so vera amuesa un texu bien arguyosu y gayasperu, ye muncho más nueva, pero caltién elementos que nos falen del so aniciu, como’l ventanu de la semeya que caltién na so testera.

Nun se onde taba asitiáu esi ventanu na construcción primitiva, pero suponiendo que fuera tamién de la testera y que tuviera nesi allugamientu, pue deducise que lleva más de milenta d’años controlando’l territoriu que xune en llinia recta Picos d’Europa con La Miranda.

A lo fondero ente la ñublina, pue malapenes vese Picos D’Europa.

La carretera empobina d’ehí pa Xixón, pasando per Villabona, sitiu aonde tamién hai un bon batulax de códigos temporales en forma de piedres y construcciones: palacios, mines, cases d’obreros… Al poco ta Tabladiello, y baxando pela carretera apréciense testimonios gráficos de delles lluches obreres; dalgunes pidíen la lliberación de Cándido y Morala, otres defendíen el movimientu insumisu… Nun pue ún resalvar delles imáxenes que tornen a la tiesta…

La siguiente parada fíxila en Serín, col enfotu d’atopar la ilesia abierta y poder sacar unes semeyes de los capiteles más nomaos del románicu xixonés, pero quedéme coles ganes, yá que llantaren detrás de la puerta metálica que ta delantre la portada unos paneles blancos que nun dexen ver nada. Polo tanto llántovos una semeya de la portada garrada d’internet, a la espera d’una meyor oportunidá.

Semeya llocalizable en http://www.asturnatura.com/patrimonio-cultural.php?municipio=gijon&tipo=arquitectura-religiosa&pg=6 . [Visitada’l 07-12-2015]. Ver tamién http://www.romanicuasturianu.net.

Pa vengame del fracasu, paré al poco de Serín, pa sacar una semeya del sitiau au s’alluga’l Castru, por supuestu ensin escavar, pero qu’al paecer forma parte del mesmu sistema poblacional cilúrnigu que la Campa Torres o los restos megalíticos de Monte Areo.

D’ehí, en direición yá a Xixón, entres nuna de les zones más degradaes de tol conceyu; el pantanu de San Andrés, tol tarrén esfarrapláu pola Zalia -que paez una llantadura de la gafa flor de la Pampa famosa- La Fabricona, el polígonu de Temañes… Inténtase deducir cómo yera aquello; una ría navegable hasta San Andrés de los Estacones, l’entregu col ríu Pinzales, la vega, Veriña… Y ye complicao. No obstante, Xixón tien munchos pequeños secretos, y munchos d’ellos tan escondíos ente esti paisax industrial tan agresivu y decadente. Paga la pena dedicar un día pa rescatar eses ayalguines del escaezu, y siguir faciendo turismu de cercaníes. Prometío.