En términos xenerales, la incapacidá de rempuesta énte’l neoliberalismu, la crisis de los ideales, la globalización o’l consiguiente desplazamientu de los núcleos de poder a estamentos que na tienen yá que ver colos gobiernos escoyíos quiciabes seya daqué qu’empobine al individualismu y la introversión, afitao too ello tamién nos medios de comunicación y nes redes sociales. Pienso que’l recién nomáu Académicu de la Llingua Asturiana David Guardado, nel so llibru Nunca vencida fai un exerciciu d’introspeición nesi sen, pero non estudiando un suxetu individual sinón coleutivu. Diendo a la gueta de les caberes razones de la nuesa forma de ser, d’actuar y de pensar como país, ufre una fondera y oxetiva diseición de la historia del pensamientu sobre Asturies, coles sos xustificaciones, aciertos y erros, que van caltriando na sociedá hasta güei, pa bien y sobre too pa mal. Ye un trabayu colosal y perminuciosu, que a min nun ye que me cambie la vida, pero embúrriame y faime fuxir de la mio realidá más inmediata, pa ser más consciente de lo qu’hai ehí fuera y de los principios que lo caltienen y conformen. Nunca vencida, pero sí secuestrada, traicionada, agredida, mangoniada y negada. Pienso que ye una aportación pernecesaria, porque creo qu’agora toca facer un exercicu d’introspección y analís, y tomar decisiones y asumir lo que braeramente somos, sobre manera dientro’l nuevu contestu social que nos arrodia. Anguaño l’enemigu amazcárase tres de conceutos como la derechización de la sociedá, el poder mediáticu, o mesmamente la xentrificación o’l cambéu climáticu, que son fuerces planetaries (que diría Bauman), que debasen la capacidá d’aición de les persones, poblaciones y gobiernos. Too ello desixe que la nuesa sociedá s’afite en pegoyos bien llantaos pa ser quien a apurrir otra necesaria reaición a los nuevos estímulos. Si nun queremos dexar d’esistir, qu’otramiente ye bien fácil, los primero ye tener claro lo que somos. Lo qu’hasta agora queríen y quieren dalgunos que seyamos, ello ye una finca pa urbanizar, una coleición de tópicos, un parque temáticu o cenciellamente un pueblu muertu, eso yá lo sabemos. Munchísimes gracies, David.

#davidguardado #nuncavencida #lafabriquina